മലയാളത്തിന്റെ നടനവിസ്മയം മോഹന്‍ലാലിന് ഇന്ന് 62-ാം പിറന്നാള്‍; ആശംസകളുമായി താരങ്ങള്‍
Entertainment Desk
Posted On May 21, 2022
മലാളസിനിമയിലെ അഭിനയചക്രവര്‍ത്തി മോഹന്‍ലാലിന് ഇന്ന് 62-ാം പിറന്നാള്‍. പ്രിയതാരത്തിന് പിറന്നാള്‍ ആശംസകള്‍ നേര്‍ന്ന് രംഗത്ത് വന്നിരിക്കുകയാണ് ആരാധകരും സിനിമാലോകവും. ഒരുമിച്ചുള്ള ചിത്രം പങ്കുവച്ചുകൊണ്ടാണ് മമ്മൂട്ടി പിറന്നാള്‍ ആശംസകള്‍ നേര്‍ന്നത്. പ്രിയപ്പെട്ട ലാലിന് ജന്മദിനാശംസകള്‍ എന്നാണ് അദ്ദേഹം കുറിച്ചത്.
കൂടാതെ മഞ്ജു വാര്യര്‍, പൃഥ്വിരാജ്, ഇന്നസെന്റ് മുന്‍ മന്ത്രി ഷിബു ബേബിജോണ്‍ തുടങ്ങിയവരും മോഹന്‍ലാലിന് പിറന്നാള്‍ ആശംസകളുമായി എത്തിയിട്ടുണ്ട്. മോഹന്‍ലാലിന് പിറന്നാള്‍ സമ്മാനമായി ഒരു വീഡിയോ പൃഥ്വിരാജ് പുറത്തുവിട്ടുണ്ട്. പൃഥ്വിരാജ് സംവിധാനം ചെയ്ത് മോഹന്‍ലാലിനൊപ്പം അച്ഛനും മകനുമായി അഭിനയിച്ച ബ്രോഡാഡി എന്ന ചിത്രത്തിലെ ഡയറക്ടേഴ്‌സ് കട്ട് ആണ് വീഡിയോ. പിറന്നാള്‍ ആശംസകള്‍ നേര്‍ന്നുകൊണ്ടാണ് താരം ഈ വീഡിയോ സമൂഹമാധ്യമങ്ങളില്‍ പങ്കുവച്ചത്.
സിനിമാലോകത്തെ പ്രമുഖര്‍ മാത്രമല്ല രാഷ്ട്രീയ സാമൂഹ്യ രംഗത്തുള്ളവരും മോഹന്‍ലാലിന് ആശംസകളുമായി എത്തിയിട്ടുണ്ട്. മുന്‍ മന്ത്രി ഷിബു ബേബി ജോണ്‍ ഫെയ്‌സ്ബുക്കില്‍ പങ്കുവെച്ച കുറിപ്പിലൂടെയാണ് ആശംസകള്‍ നേര്‍ന്നത്. രണ്ടുപേരുടെയും ചിത്രങ്ങള്‍ പങ്കുവെച്ച കുറിപ്പിലാണ് മോഹന്‍ലാലുമായുള്ള സൗഹൃദത്തെ കുറിച്ച് മനസുതുറന്നത്. ’35 വര്‍ഷങ്ങള്‍ക്ക് മുമ്പ് ഞങ്ങള്‍ പരിചയപ്പെട്ടു. ആ പരിചയം സൗഹൃദമായി. സൗഹൃദം പിന്നെ സഹോദരനിര്‍വിശേഷമായ സ്‌നേഹമായി. ഇന്ന് ലോകം ആരാധിക്കുന്ന ഈ മഹാകലാകാരനെ എന്റേതെന്ന് പറഞ്ഞു ചേര്‍ത്തുപിടിക്കുമ്പോള്‍ അഭിമാനമാണ്’. ഇതായിരുന്നു ഷിബു ബേബി ജോണിന്റെ വാക്കുകള്‍.
ഇന്നലെ ഖത്തറിലായിരുന്ന മോഹന്‍ലാല്‍ ഇന്ന് മുംബയിലെത്തും. സോഷ്യല്‍ മീഡിയയില്‍ ആരാധകര്‍ പതിവ് പോലെ ലാലേട്ടന്റെ പിറന്നാള്‍ ആഘോഷമാക്കുകയാണ്. സര്‍ക്കാരിന്റെ ‘മൃതസഞ്ജീവനി’ പദ്ധതിയുമായി സഹകരിച്ച് സംസ്ഥാനത്തൊട്ടാകെ ആരാധകര്‍ ഇന്ന് അവയവദാന സമ്മതപത്രം നല്‍കും.
1980ല്‍ വില്ലനായി ആരംഭിച്ച സിനിമാജീവിതം നായക, സൂപ്പര്‍ നായക വേഷങ്ങള്‍ക്കൊടുവില്‍ സംവിധാനത്തില്‍ എത്തി നില്‍ക്കുകയാണ്. ‘ബറോസ്’ എന്ന സിനിമയുടെ ഷൂട്ടിങ് തിരക്കിലാണ് അദ്ദേഹം. അഭിനയ ജീവിതത്തില്‍ 43 വര്‍ഷങ്ങള്‍ പിന്നിടുമ്പോള്‍ മോഹന്‍ലാല്‍ അന്നും ഇന്നും എന്നും മലയാളികളുടെ സ്വകാര്യ അഹങ്കാരമാണ്.
Content Highlight – Today marks the 62nd birthday of Mohanlal, the emperor of Malayalam cinema
Trending Now
