അമേരിക്കയിലെ ഫ്രൈറ്റ് നൈറ്റ് ഫിലിം ഫെസ്റ്റിവലില്‍ മികച്ച സൂപ്പര്‍ നാച്ച്‌വറല്‍ ത്രില്ലര്‍ പുരസ്കാരം; ചരിത്രം കുറിച്ച്‌ ‘വടക്കൻ’

അമേരിക്കയിലെ പ്രശസ്തമായ ഫ്രൈറ്റ് നൈറ്റ് ഫിലിം ഫെസ്റ്റിവലില്‍ ഇതാദ്യമായി മികച്ച സൂപ്പർ നാച്വറല്‍ ത്രില്ലർ ചിത്രമായി ചരിത്രം രചിച്ച്‌ മലയാളത്തില്‍ നിന്നൊരു ചിത്രം.

സജീദ് എ. സംവിധാനം ചെയ്ത് കിഷോറും ശ്രുതി മേനോനും പ്രധാന വേഷങ്ങളിലെത്തിയിരിക്കുന്ന ‘വടക്കൻ’ എന്ന ഈ സൂപ്പർ നാച്വറല്‍ ത്രില്ലർ‍ ഓഫ് ബീറ്റ് സ്റ്റുഡിയോസാണ് നിർമ്മിച്ചിരിക്കുന്നത്. മലയാള സിനിമയുടെ ചരിത്രത്തില്‍ തന്നെ ആദ്യമായാണ് ഫ്രൈറ്റ് നൈറ്റ് ഫെസ്റ്റിലേക്ക് കേരളത്തില്‍ നിന്നൊരു ചിത്രം വിജയിക്കുന്നതെന്ന പ്രത്യേകതയുമുണ്ട്. ഈ മാസം 28നായിരുന്നു ഫ്രൈറ്റ് നൈറ്റ് ഫിലിം ഫെസ്റ്റിവല്‍ നടന്നത്. ”വടക്കൻ’, ഹൃദ്യവും മനോഹരവുമായ ചിത്രം. ഛായാഗ്രഹണം ബ്രില്ല്യന്‍റാണ്. ഒപ്പം ശക്തമായ തിരക്കഥയും സംവിധാനവും അവിശ്വസനീയമായ പ്രകടനങ്ങളും!” എന്നാണ് ഫ്രൈറ്റ് നൈറ്റ് ഫിലിം ഫെസ്റ്റിവല്‍ ഡയറക്ടർ കെൻ ഡാനിയെല്‍സ് ചിത്രത്തെ കുറിച്ച്‌ പറഞ്ഞ അഭിപ്രായം.

സെലിബ്രിറ്റികളും ഹൊറർ സിനിമ പ്രേമികളും ബോളിവുഡ്, ഹോളിവുഡ് താരങ്ങളും പങ്കെടുത്ത ഗാല സ്ക്രീനിങ്ങില്‍ 7 സിനിമകളില്‍ ഒന്നായാണ് വടക്കൻ തെരഞ്ഞെടുക്കപ്പെട്ടത്. റസൂല്‍ പൂക്കുട്ടി, കീക്കോ നകഹര, ബിജിബാല്‍, ഉണ്ണി ആർ. എന്നീ പ്രശസ്തർ അണിയറയില്‍ ഒരുമിക്കുന്ന ‘വടക്കൻ’ ഈ വിഭാഗത്തില്‍ ഇടംനേടിയ ഏക മലയാളചിത്രവുമാണ്.