മഞ്ജുവാര്യരും സൗബിൻ ഷാഹിറും ഒന്നിക്കുന്ന ‘വെള്ളരിപട്ടണ’ത്തിൻ്റെ ടീസർ പുറത്തിറങ്ങി

മഹേഷ് വെട്ടിയാർ സംവിധാനം ചെയ്യുന്ന  ‘വെള്ളരിപട്ടണ’ത്തിന്റ ഒഫീഷ്യൽ ടീസർ പുറത്തിറങ്ങി. മഞ്ജുവാര്യരുടെ സോഷ്യല്‍ മീഡിയ അക്കൗണ്ടുകളിലൂടെയാണ് ടീസർ പുറത്തിറങ്ങിയത്. മഞ്ജു വാര്യരും  സൗബിൻ ഷാഹിറും നായികാ നായകന്മാരായി അഭിനയിക്കുന്ന സിനിമയിൽ പ്രധാന കഥാപാത്രങ്ങളായി അണിനിരക്കുന്നത് സലിംകുമാര്‍,സുരേഷ്‌കൃഷ്ണ,കൃഷ്ണശങ്കര്‍,ശബരീഷ് വര്‍മ,അഭിരാമി ഭാര്‍ഗവന്‍,കോട്ടയം രമേശ്,മാലപാര്‍വതി,വീണനായര്‍,പ്രമോദ് വെളിയനാട് തുടങ്ങിയവരാണ്.

വാള്‍പ്പയറ്റു നടത്തുന്ന മഞ്ജുവും സൗബിനുമായിരുന്നു ‘വെളളരിപട്ടണ’ത്തിന്റെ ഫസ്റ്റ് ലുക്ക് പോസ്റ്ററിൽ ഉണ്ടായിരുന്നത്. നര്‍മത്തിൽ ചാലിച്ച ഒരു ഫീൽ ഗുഡ് അനുഭവമാണ് സിനിമയിൽ ഉടനീളം ഒരുക്കിയിരിക്കുന്നത് എന്നതിന്റെ സൂചന നല്കുന്നതാണ് ടീസര്‍. ആക്ഷന്‍ ഹീറോ ബിജു,അലമാര,മോഹന്‍ലാല്‍,കുങ്ഫുമാസ്റ്റര്‍ തുടങ്ങിയ സിനിമകളുടെ നിർമ്മാതാക്കളായ ഫുള്‍ ഓണ്‍ സ്റ്റുഡിയോസാണ്  ഈ ചിത്രം നിർമ്മിക്കുന്നത്. 

അലക്‌സ് ജെ.പുളിക്കലാണ് ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത്. അപ്പു എന്‍ ഭട്ടതിരി എഡിറ്റിങ് നിർവ്വഹിച്ച ചിത്രത്തിൻ്റെ  സംഗീതം പകരുന്നത് സച്ചിന്‍ ശങ്കര്‍ മന്നത്ത് ആണ്.

Content Highlight: Vellari Pattanam teaser