മോദി ഒരു നാടകവും കളിച്ചിട്ടില്ല; രാഹുൽ ഇഡിയുടെ മുന്നിൽ ഹാജരാകാതെ നാടകം കളിക്കുന്നു: അമിത് ഷാ

ഗുജറാത്ത് കലാപക്കേസില്‍ നരേന്ദ്രമോദിക്കെതിരായ കേസന്വേഷണവും രാഹുൽ ഗാന്ധിക്കെതിരായ എൻഫോഴ്സ്മെൻ്റ് ഡയറക്ടറേറ്റ് അന്വേഷണവും താരതമ്യം ചെയ്ത് കേന്ദ്ര ആഭ്യന്തരമന്ത്രി അമിത് ഷാ. മോദി പ്രത്യേക അന്വേഷണ സംഘത്തിന് മുന്നിൽ ഒരു നാടകവും കളിച്ചിട്ടില്ലെന്നും എന്നാൽ രാഹുൽ ഇഡിയ്ക്കു മുന്നിൽ നാടകം കളിക്കുകയാണെന്നും അമിത് ഷാ പറഞ്ഞു. സുപ്രിംകോടതി മോദിയ്ക്ക് ക്ലീന്‍ ചിറ്റ് നല്‍കിയ സാഹചര്യത്തിലാണ് അമിത് ഷായുടെ പ്രസ്താവന.

‘മോദി പ്രത്യേക അന്വേഷണ സംഘത്തിന് മുന്‍പാകെ ഹാജരാകുമ്പോള്‍ ഒരു നാടകവും കളിച്ചിട്ടില്ല. സത്യത്തിന് വേണ്ടി കാത്തിരിക്കുകയായിരുന്നു. അന്ന് മുഖ്യമന്ത്രിയായിരുന്ന മോദിയെ ചോദ്യം ചെയ്യണമായിരുന്നെങ്കില്‍ അദ്ദേഹം സഹകരിക്കുമായിരുന്നു. അല്ലാതെ രാഹുല്‍ എന്തിനാണ് ഇഡിക്ക് മുന്നില്‍ നാടകം കളിച്ചുകൊണ്ടിരിക്കുന്നത്? അമിത് ഷാ ചോദിച്ചു.

നരേന്ദ്രമോദി ഉള്‍പ്പെടെ 63 പേര്‍ക്ക് 2002ലെ ഗുജറാത്ത് കലാപക്കേസില്‍ ക്ലീന്‍ ചിറ്റ് നൽകിയതിനെ ചോദ്യം ചെയ്തുകൊണ്ടുള്ള ഹർജി സുപ്രീം കോടതി തള്ളിയിരുന്നു. കലാപത്തിൽ കൊല്ലപ്പെട്ട കോൺഗ്രസ് എംപിയായിരുന്ന എഹ്സാൻ ജഫ്രിയുടെ ഭാര്യ സാക്കിയ ജഫ്രി നൽകിയ ഹർജിയാണ് ജസ്റ്റിസുമാരായ എ എം ഖാന്‍വില്‍ക്കര്‍, ദിനേഷ് മെഹേശ്വരി, സി ടി രവികുമാര്‍ എന്നിവരടങ്ങിയ ബെഞ്ച് തള്ളിയത്.