ബിഹാര്‍ മുഖ്യമന്ത്രി നിതീഷ് കുമാര്‍ രാജിവെച്ചു

ബിഹാര്‍ മുഖ്യമന്ത്രി നിതീഷ് കുമാര്‍ രാജി സമര്‍പ്പിച്ചു. രാജ്ഭവനിലെത്തി ഗവര്‍ണര്‍ ഫാഗു ചൌഹാനാണ് രാജി സമര്‍പ്പിച്ചത്. ഇതോടെ ജെ.ഡി.യു എന്‍.ഡി.എ സഖ്യം വിട്ടു. ആര്‍.ജെ.ഡി, കോണ്‍ഗ്രസ് സഖ്യത്തിനൊപ്പം പുതിയ സര്‍ക്കാര്‍ രൂപീകരിക്കും.

ജെ.ഡി.യു.വും ബി.ജെ.പി.യും തമ്മിലുള്ള ചേരിപ്പോരുകള്‍ക്കിടെ കഴിഞ്ഞ ദിവസമാണ് എം.പിമാരോടും എം.എല്‍.എമാരോടും ഉടന്‍ പട്‌നയിലെത്താന്‍ മുഖ്യമന്ത്രി നിതീഷ് കുമാര്‍ ആവശ്യപ്പെട്ടത്. ബി.ജെ.പി അപമാനിച്ചെന്നു ജെ.ഡി.യു യോഗത്തിൽ നിതീഷ് കുമാര്‍ പറഞ്ഞു.ഭൂരിപക്ഷം എം.എല്‍.എമാരും എം.പിമാരും എന്‍.ഡി.എ സഖ്യം വിടണമെന്ന് ആവശ്യപ്പെട്ടെന്ന് രാജി സമര്‍പ്പിച്ച ശേഷം നിതീഷ് കുമാര്‍ പറഞ്ഞു.

243 അംഗ ബിഹാര്‍ നിയമസഭയില്‍ നിലവില്‍ 80 എം.എല്‍.എമാരുമായി ആര്‍.ജെ.ഡിയാണ് വലിയ ഒറ്റക്കക്ഷി. ബി.ജെ.പിക്ക് 77ഉം ജെ.ഡി.യുവിന് 45ഉം എം.എല്‍.എമാരാണുള്ളത്. കോണ്‍ഗ്രസിന് 19 സീറ്റുണ്ട്. സിപിഐ എംഎല്ലിന് 12ഉം സിപിഐക്കും സിപിഎമ്മിനും രണ്ട് വീതവും എംഎല്‍എമാരുണ്ട്. 122 സീറ്റാണ് കേവല ഭൂരിപക്ഷത്തിനു വേണ്ടത്.

മുഖ്യമന്ത്രി നിതീഷ് കുമാറിനെതിരെ ബി.ജെ.പി അണിയറയില്‍ പടയൊരുക്കം നടത്തിയെന്നാണ് ജെ.ഡി.യുവിന്റെ പരാതി. മഹാരാഷ്ട്ര മോഡലില്‍ പാര്‍ട്ടിക്കുള്ളില്‍ വിമതരെ സൃഷ്ടിക്കാന്‍ ബി.ജെ.പി ശ്രമിച്ചെന്നാണ് ജെ.ഡി.യു നേതൃത്വത്തിന്റെ സംശയം. രണ്ടാം മോദി സര്‍ക്കാരില്‍ ജെ.ഡി.യുവിന്റെ മന്ത്രിയായിരുന്ന ആര്‍.സി.പി സിങ്ങിനെ മുന്നില്‍നിര്‍ത്തി ബി.ജെ.പി വിമത നീക്കത്തിന് ശ്രമം നടത്തിയെന്നാണ് ആരോപണം. പിന്നാലെ സിങ് പാര്‍ട്ടി വിട്ടു.

നേരത്തെ ആര്‍.ജെ.ഡിയുമായുള്ള സഖ്യം അവസാനിപ്പിച്ചാണ് ജെ.ഡി.യു ബി.ജെ.പിയോടൊപ്പം ചേര്‍ന്നത്. നിലവിലെ ഇരു പാര്‍ട്ടികളുടെയും ഭിന്നതയുടെ പശ്ചാത്തലത്തില്‍ ബി.ജെ.പിയുമായുള്ള സഖ്യം ഉപേക്ഷിച്ചാല്‍ ജെ.ഡി.യുവിനെ പിന്തുണയ്ക്കാമെന്ന് ആര്‍.ജെ.ഡി അറിയിച്ചിരുന്നു. അങ്ങനെയെങ്കില്‍ തേജസ്വി യാദവ് ആഭ്യന്തര വകുപ്പിന്‍റെ ചുമതലയുള്ള ഉപമുഖ്യമന്ത്രിയാകും. തേജസ്വിയുടെ സഹോദരന്‍ തേജ് പ്രതാപ് യാദവും മന്ത്രിയാകും. കോണ്‍ഗ്രസിനായിരിക്കും സ്പീക്കര്‍ പദവി.

കഴിഞ്ഞ മൂന്നോ നാലോ മാസങ്ങളായി അണിയറയില്‍ സഖ്യമാറ്റം സംബന്ധിച്ച പദ്ധതികള്‍ തയ്യാറായി വരികയായിരുന്നു എന്നാണ് ജെ.ഡി.യു വൃത്തങ്ങള്‍ നല്‍കുന്ന സൂചന. ആർ.ജെ.ഡിയുമായി നേരത്തെയുണ്ടായിരുന്ന സഖ്യം അവസാനിപ്പിച്ചപ്പോൾ അഴിമതിക്കേസിൽ ആരോപണവിധേയനായ തേജസ്വി യാദവിനെതിരെ നിതീഷ് കുമാർ നടത്തിയ വിമര്‍ശനമാണ് പദ്ധതികള്‍ വൈകിച്ചത്. മെയ് മാസത്തില്‍ നിതീഷ് കുമാര്‍ തേജസ്വി യാദവിന്‍റെ വീട്ടിലെത്തി ഇഫ്താര്‍ വിരുന്നില്‍ പങ്കെടുത്തു. തിരിച്ച് തേജസ്വി, നിതീഷ് കുമാറിന്റെ ക്ഷണവും സ്വീകരിച്ചു. പിന്നാലെ പതുക്കെ മഞ്ഞുരുകുകയായിരുന്നു.

Content Highlights – Bihar Chief Minister Nitish Kumar has resigned