മഹാസഖ്യം ഉപേക്ഷിച്ച് ജാര്‍ഖണ്ഡ് മുക്തി മോര്‍ച്ച; സ്വതന്ത്രമായി മത്സരിക്കാന്‍ തീരുമാനം
National Desk
Posted On October 19, 2025
ബിഹാര്‍ തെരഞ്ഞെടുപ്പില്‍ മഹാസഖ്യത്തിന് തിരിച്ചടി. ജാര്‍ഖണ്ഡ് മുക്തി മോര്‍ച്ച മഹാസഖ്യം ഉപേക്ഷിച്ചു. തെരഞ്ഞെടുപ്പില്‍ സ്വതന്ത്രമായി മത്സരിക്കാനാണ് തീരുമാനം. ആറ് സീറ്റുകളില്‍ മത്സരിക്കുമെന്ന് പാര്‍ട്ടി ജനറല്‍ സെക്രട്ടറി സുപ്രിയോ ഭട്ടാചാര്യ പറഞ്ഞു.
‘ബിഹാര്‍ തെരഞ്ഞെടുപ്പില്‍ ഒറ്റയ്ക്ക് മത്സരിക്കാന്‍ പാര്‍ട്ടി തീരുമാനിച്ചു. ആറ് സീറ്റുകളില്‍ ഞങ്ങൾ മത്സരിക്കും. ചക്കായ്, ധംധ, കട്ടോരിയ, മണിഹാരി, ജാമുയി, പിര്‍പൈന്‍തി എന്നീ മണ്ഡലങ്ങളില്‍ മത്സരിക്കും’, സുപ്രിയോ ഭട്ടാചാര്യ പറഞ്ഞു. സീറ്റ് വിഭജനവുമായി ബന്ധപ്പെട്ട് ആര്‍ജെഡി, കോണ്‍ഗ്രസ് നേതൃത്വവുമായി ബന്ധപ്പെട്ടിരുന്നുവെന്നും എന്നാല്‍ തീരുമാനമായില്ലെന്നും സുപ്രിയോ ഭട്ടാചാര്യ പറഞ്ഞു. തെരഞ്ഞെടുപ്പിന് ദിവസങ്ങള്‍ മാത്രം ബാക്കിനില്‍ക്കെ ജാര്‍ഖണ്ഡ് മുക്തി മോര്‍ച്ചയുടെ തീരുമാനം പ്രതിപക്ഷ സഖ്യത്തിന് തിരിച്ചടിയാകും എന്നാണ് കണക്ക് കൂട്ടുന്നത്.
