കൈക്കൂലി കേസില്‍ ഭര്‍ത്താവ് അറസ്റ്റില്‍; രാജസ്ഥാനില്‍ മേയറെ പുറത്താക്കി

രാജസ്ഥാനില്‍ കൈക്കൂലി കേസില്‍ ഭര്‍ത്താവിനെ അറസ്റ്റ് ചെയ്തതിനു പിന്നാലെ മേയറെ സര്‍ക്കാര്‍ പുറത്താക്കി. ശനിയാഴ്ച രാത്രിയാണ് ജയ്പൂര്‍ ഹെറിറ്റേജ് മുനിസിപ്പല്‍ കോര്‍പറേഷൻ മേയര്‍ മുനീഷ് ഗുര്‍ജാറെ പുറത്താക്കിയതായി തദ്ദേശ സ്വയം ഭരണ സ്ഥാപന വകുപ്പ് ഉത്തരവ് പുറത്തിറക്കിയത്.

ഭൂമിക്ക് പട്ടയം നല്‍കുന്നതിന് രണ്ടുലക്ഷം രൂപ കൈക്കൂലി വാങ്ങിയതിന് മേയറുടെ ഭര്‍ത്താവ് സുശീല്‍ ഗുര്‍ജാറെയും മറ്റ് രണ്ടുപേരെയും വെള്ളിയാഴ്ച ആന്റി കറപ്ഷൻ ബ്യൂറോ അറസ്റ്റ് ചെയ്തിരുന്നു. പിന്നീട് ഇവരുടെ വീട്ടില്‍ നടത്തിയ പരിശോധനയില്‍ 40 രൂപയും പട്ടയവും പിടിച്ചെടുത്തിരുന്നു. ഒപ്പമുണ്ടായിരുന്ന ആളുടെ വീട്ടില്‍ നിന്ന് എട്ടുലക്ഷം രൂപയും പിടിച്ചെടുത്തു. കേസില്‍ അന്വേഷണം പൂര്‍ത്തിയാകുന്നതോടെ കുറ്റക്കാരിയല്ലെന്ന് തെളിഞ്ഞാല്‍ മേയറെ തിരിച്ചെടുക്കും.