തോഷഖാന അഴിമതി കേസില്‍ ഇമ്രാന്‍ ഖാന് മൂന്ന് വര്‍ഷം തടവുശിക്ഷ ; അഞ്ചു വര്‍ഷത്തേക്ക് തെരഞ്ഞെടുപ്പിൽ മത്സരിക്കാനാകില്ല

പാക് മുന്‍ പ്രധാനമന്ത്രി ഇമ്രാന്‍ ഖാന് മൂന്ന് വര്‍ഷം തടവുശിക്ഷ. തോഷഖാന അഴിമതി കേസില്‍ ഇസ്ലാമാബാദിലെ വിചാരണ കോടതിയാണ് ശിക്ഷ വിധിച്ചത്. കൂടാതെ ഒരു ലക്ഷം രൂപ പിഴയും ചുമത്തിയിട്ടുണ്ട്. തെരഞ്ഞെടുപ്പിലും അഞ്ചു വര്‍ഷത്തേക്ക് ഇമ്രാന്‍ഖാന് മത്സരിക്കാനാകില്ല.

തോഷഖാന കേസിലെ ഇമ്രാൻ ഖാനെതിരായ അഴിമതി ആരോപണങ്ങള്‍ തെളിഞ്ഞെന്ന് ഇസ്ലാമാബാദിലെ വിചാരണ കോടതി വ്യക്തമാക്കി. പൊതു അധികാരികള്‍ക്ക് ലഭിക്കുന്ന സമ്മാനങ്ങളും മറ്റ് വിലകൂടിയ വസ്തുക്കളും സംരക്ഷിക്കുന്ന കാബിനറ്റ് ഡിവിഷന്റെ ഭരണപരമായ അധികാരപരിധിയിലുള്ള ഒരു വകുപ്പാണ് തോഷഖാന. 1974-ല്‍ സ്ഥാപിതമായ ഇത് ക്യാബിനറ്റ് ഡിവിഷനിലേക്ക് ലഭിച്ച സമ്മാനങ്ങളും മറ്റ് വിലപിടിപ്പുള്ള സാമഗ്രികളും അതിന്റെ നിയമങ്ങള്‍ അനുസരിച്ച്‌ പ്രഖ്യാപിക്കാൻ ഉദ്യോഗസ്ഥര്‍ ബാധ്യസ്ഥരാണ്. എന്നാല്‍ 2018 ല്‍ അധികാരത്തിലെത്തിയ ഇമ്രാൻഖാൻ തന്റെ ഭരണകാലത്തുടനീളം തനിക്ക് ലഭിച്ച നിരവധി സമ്മാനങ്ങളുടെ വിശദാംശങ്ങള്‍ വെളിപ്പെടുത്താൻ വിസമ്മതിച്ചിരുന്നു. അങ്ങനെ ചെയ്യുന്നത് മറ്റ് രാജ്യങ്ങളുമായുള്ള ബന്ധത്തെ അപകടത്തിലാക്കുമെന്ന് അദ്ദേഹം അവകാശപ്പെട്ടു.

തോഷഖാന എന്ന സ്റ്റേറ്റ് ഡിപ്പോസിറ്ററിയില്‍ നിന്ന് കുറഞ്ഞ വിലയ്ക്ക് തനിക്ക് ലഭിച്ച വിലകൂടിയ ഗ്രാഫ് റിസ്റ്റ് വാച്ച്‌ ഉള്‍പ്പെടെയുള്ള സമ്മാനങ്ങള്‍ സ്വന്തം ലാഭത്തിനായി വിറ്റു എന്നാണ് ഇമ്രാൻഖാനെതിരെയുള്ള പ്രധാന ആരോപണം. ഇന്ത്യൻ എക്‌സ്‌പ്രസിന്റെ റിപ്പോര്‍ട്ട് പ്രകാരം 2022 ഓഗസ്റ്റില്‍ പാക്കിസ്ഥാൻ സര്‍ക്കാര്‍ സമ്മാനങ്ങളെക്കുറിച്ചുള്ള വിവരങ്ങള്‍ വെളിപ്പെടുത്തുന്നതില്‍ പരാജയപ്പെട്ടുവെന്ന് ആരോപിച്ച്‌ ഇമ്രാനെതിരെ കേസ് ഫയല്‍ ചെയ്തതോടെയാണ് തോഷഖാന വിവാദം വീണ്ടും ഉയര്‍ന്നത്.