തുടര്‍ച്ചയായി വിഡിയോ കോള്‍, അശ്ലീല ദൃശ്യങ്ങള്‍ അയച്ചു; പ്രവാസിക്കെതിരെ പരാതിയുമായി യൂത്ത് കോണ്‍ഗ്രസ് നേതാവ്

അശ്ലീല ദൃശ്യങ്ങള്‍ അയച്ചെന്ന പരാതിയുമായി യൂത്ത് കോണ്‍ഗ്രസ് സംസ്ഥാന വൈസ് പ്രസിഡൻറ് അരിത ബാബു. വിദേശ നമ്ബറില്‍ നിന്നാണ് അശ്ലീല ദൃശ്യങ്ങള്‍ വന്നത്. സംഭവത്തില്‍ കായംകുളം ഡിവൈഎസ്പി ഓഫീസില്‍ നേരിട്ട് എത്തി പരാതി നല്‍കുകയായിരുന്നു.

പ്രവാസിയായ മലപ്പുറം അമരമ്ബലം സ്വദേശി ഷമീറാണ് അശ്ലീല ദൃശ്യങ്ങള്‍ അയച്ചത്. വിദേശ നമ്ബരില്‍ നിന്നും ആദ്യം വാട്സാപ്പില്‍ തുടര്‍ച്ചയായി വീഡിയോ കോള്‍ വരുകയായിരുന്നു. പിന്നീട് അശ്ലീല ദൃശ്യങ്ങള്‍ അയച്ചു.സോഷ്യല്‍ മീഡിയയിലൂടെ കഴിഞ്ഞ ദിവസം അരിത തനിക്കുണ്ടായ മോശം അനുഭവം പങ്കുവച്ചിരുന്നു. വിഡിയോ സ്ക്രീൻഷോട്ട് ഉള്‍പ്പടെയാണ് പങ്കുവച്ചത്.

വിദേശത്തുള്ള സുഹൃത്തുക്കള്‍ക്ക് നമ്ബര്‍ ഷെയര്‍ ചെയ്തതിനെ തുടര്‍ന്ന് ഇയാള്‍ ഖത്തറില്‍ ആണെന്ന് കണ്ടെത്തി. സുഹൃത്തുക്കള്‍ ഇയാളുമായി നേരിട്ട് ബന്ധപ്പെടുകയും ചെയ്തു. സംഭവം പ്രശ്നമായതോടെ മാപ്പ് പറഞ്ഞ് തലയൂരാൻ ഇയാള്‍ ശ്രമിച്ചെങ്കിലും പരാതിയുമായി മുന്നോട്ടുപോകാൻ അരിത ബാബു തീരുമാനിക്കുകയായിരുന്നു.