സംസ്ഥാനത്ത് അതിശക്തമായ മഴ തുടരും; കാസർകോട്ടും കണ്ണൂരും വിദ്യാഭ്യാസ സ്ഥാപനങ്ങൾക്ക് അവധി

സംസ്ഥാനത്ത് ഇന്നും ശക്തമായ മഴയ്ക്ക് സാധ്യത. കാസർകോട്, കണ്ണൂർ, കോഴിക്കോട്, മലപ്പുറം, തൃശൂർ, ഇടുക്കി എന്നീ ജില്ലകളിൽ ഓറഞ്ച് അലർട്ട് . കാസർകോട്ടും കണ്ണൂരും വിദ്യാഭ്യാസ സ്ഥാപനങ്ങൾക്ക് അവധി നൽകി.കാസർക്കോട്ടെ കോളജുകൾക്ക് അവധി ബാധകമല്ല.

തിരുവനന്തപുരത്തും കൊല്ലത്തും മഴ മുന്നറിയിപ്പില്ല. അറബികടലിൽ പടിഞ്ഞാറൻ /തെക്ക് പടിഞ്ഞാറൻ കാറ്റ് ശക്തമാകുന്നതാണ് മഴ ശക്തമാകാനുള്ള പ്രധാന കാരണം. മത്സ്യത്തൊഴിലാളികൾ കടലിൽ പോകരുതെന്നും നിർദേശമുണ്ട്. മലയോര മേഖലയിലും കനത്ത ജാഗ്രതാ നി‌ർദശമുണ്ട്. മലയോര മേഖലയിൽ മണ്ണിടിച്ചിലിനുള്ള സാധ്യത മുന്നിൽ കണ്ട് ഒറ്റപ്പെട്ട പ്രദേശങ്ങളിൽ താമസിക്കുന്നവരോട് മാറിത്താമസിക്കാൻ ആവശ്യപ്പെട്ടിട്ടുണ്ട്.

നേരത്തെയുള്ള മഴയിൽ പെട്ടന്ന് വെള്ളം കയറുന്ന സ്ഥലങ്ങളിലുള്ളവരോടും മാറിത്താമസിക്കാൻ ആവശ്യപ്പെട്ടിട്ടുണ്ട്. എല്ലാ ജില്ലാ ആസ്ഥാനങ്ങളിലും മഴക്കാല പ്രശ്നങ്ങൾ ഏകോപിപ്പിക്കാൻ ഏകജാലക സംവിധാനം തുറക്കാനൊരുങ്ങുകയാണ് സർക്കാർ. ഇടുക്കിയിലും വയനാട്ടിലും ദേശീയ ദുരന്തനിവാരണ സേനാംഗങ്ങളെ വിന്യസിച്ചിട്ടുണ്ട്.

Content Highlight: Heavy rain, continue, state, Kasargod, Kannur, School, Leave