ഭാരത് ജോഡോ യാത്രയക്കിടെ പോക്കറ്റടി; പ്രതികളെ തിരിച്ചറിഞ്ഞതായി പൊലീസ്

കോണ്‍ഗ്രസ് എം പി രാഹുല്‍ ഗാന്ധിയുടെ നേതൃത്വത്തിലുള്ള ഭാരത് ജോഡോ യാത്രയില്‍ പോക്കറ്റടി. നേമത്തു നിന്നുള്ള യാത്രയിലാണ് തമിഴ്‌നാടു നിന്നുള്ള സംഘം പര്യടനത്തില്‍ കടന്നു കൂടിയത്. സിസിടിവി ദൃശ്യങ്ങളില്‍ നിന്നും പ്രതികളെ കണ്ടെത്തിയതായി പൊലീസ് അറിയിച്ചു.

നേമം വെള്ളായണി ജംങ്ഷനില്‍ നിന്ന് പട്ടത്തേക്കായിരുന്നു ജോഡോ യാത്ര. യാത്രയില്‍ പങ്കെടുത്ത രണ്ടു പേര്‍ തങ്ങളുടെ പോക്കറ്റടിച്ചെന്ന് പൊലീസില്‍ പരാതി നല്‍കിയിരുന്നു. തുടര്‍ന്ന് നടത്തിയ അന്വേഷണത്തിലാണ് സിസിടിവി ദൃശ്യങ്ങള്‍ ലഭ്യമായത്. പോക്കറ്റടി സംഘത്തെ ഉടന്‍ അറസ്റ്റ് ചെയ്യുമെന്ന് തിരുവനന്തപുരം പൊലീസ് കമ്മീഷണര്‍ അറിയിച്ചു.

രാഹുല്‍ ഗാന്ധിയെ കാണാനെത്തിയവരുടെ പോക്കറ്റിടിക്കുകയാണ് ഇവരുടെ ലക്ഷ്യമെന്നാണ് പൊലീസിന്റെ പ്രാഥമികമായ വിവരം. സംഘത്തിലുള്ള നാലു പേരുടെ ദൃശ്യങ്ങള്‍ പൊലീസിന് ലഭിച്ചിട്ടുണ്ട്. രണ്ടു സ്ഥലങ്ങളിലായി ഇവര്‍ പോക്കറ്റടിക്കുന്ന ദൃശ്യങ്ങളാണ് ലഭിച്ചിരിക്കുന്നത്.

Content Highlights – Pickpocket Gang entered in Bharat Jodo Yatra