തിരുവനന്തപുരത്ത് തോക്കുചൂണ്ടി ഭീതി വിതച്ച് മോഷ്ടാക്കള്‍

തിരുവനന്തപുരത്ത് തോക്കു ചൂണ്ടി മോഷ്ടാക്കള്‍. തിങ്കളാഴ്ച ഇടപ്പഴഞ്ഞിയിലെ ഹൗസിംഗ് കോളനിയിലാണ് സംഭവം. അടഞ്ഞു കിടന്ന വീട് കുത്തിത്തുറന്ന് മോഷണം നടത്താന്‍ ശ്രമിച്ച മോഷ്ടാക്കള്‍ സമീപവാസികള്‍ തടയാനെത്തിയപ്പോള്‍ തോക്കുചൂണ്ടി ഭീഷണിപ്പെടുത്തി രക്ഷപ്പെടുകയായിരുന്നു. സ്‌കൂട്ടറില്‍ കയറി രക്ഷപ്പെട്ട ഇവരെ കണ്ടെത്താന്‍ പോലീസ് തെരച്ചില്‍ ആരംഭിച്ചു.

ഹൗസിംഗ് കോളനിയില്‍ നിന്ന് രക്ഷപ്പെട്ട ഇവര്‍ ഇടപ്പഴഞ്ഞിയിലെ ഒരു സ്‌പെയര്‍ പാര്‍ട്‌സ് കടയിലേക്കാണ് എത്തിയത്. നാട്ടുകാര്‍ അറിയിച്ചതനുസരിച്ച് ഇവിടെയെത്തിയ പോലീസുകാരുടെ നേരെയും ഇവര്‍ തോക്കു ചൂണ്ടി രക്ഷപ്പെട്ടു. മോഷ്ടാക്കളുടെ സിസിടിവി ദൃശ്യങ്ങള്‍ പോലീസിന് ലഭിച്ചിട്ടുണ്ട്.

ഇവരുടെ കൈവശമുണ്ടായിരുന്നത് യഥാര്‍ത്ഥ തോക്കാണോ എന്നത് വ്യക്തമല്ലെന്നാണ് പോലീസ് പറയുന്നത്. സ്‌കൂട്ടറിന്റെ നമ്പറും സിസിടിവി ദൃശ്യങ്ങളും പോലീസ് പുറത്തു വിട്ടിട്ടുണ്ട്.