സംസ്ഥാനത്ത് പാൽ വില വർധിക്കും?? ലിറ്ററിന് 60 രൂപയാക്കണമെന്ന് ആവശ്യം

സംസ്ഥാനത്ത് പാലിന്റെ വില കൂട്ടുന്നതിൽ തീരുമാനം ഇന്ന് ഉണ്ടായേക്കും. വിവിധ യൂണിയനുകളുടെ നിർദ്ദേശം ചർച്ച ചെയ്യാൻ മിൽമ ഭരണസമിതി യോഗം ഇന്ന് ചേരും. തിരുവനന്തപുരം, എറണാകുളം, മലബാർ യൂണിയനുകൾ വില കൂട്ടാൻ ശുപാർശ ചെയ്തിട്ടുണ്ട്. കൊഴുപ്പ് കൂടിയ പാൽ ലിറ്ററിന് 56 രൂപയ്ക്കാണ് വിൽക്കുന്നത്. ഇത് 60 രൂപയാക്കി ഉയർത്തണമെന്നാണ് കർഷകരുടെ ആവശ്യം.
10 രൂപ കൂട്ടിയാൽ പാൽ വില ലിറ്ററിന് 60 രൂപയ്ക്ക് മുകളിലാകും. എന്നാൽ വലിയ വർധനവിലേക്ക് പോകാൻ സാധ്യതയില്ലെന്നാണ് വിവരം. 2022 ഡിസംബറിലാണ് ഇതിന് മുൻപ് സംസ്ഥാനത്ത് പാൽ വില കൂട്ടിയത്. പാൽ വില വർധിപ്പിക്കണമെന്ന ആവശ്യം ശക്തമായതോടെ മിൽമ ഭരണസമിതി ബന്ധപ്പെട്ട മേഖലകളിലെ യൂണിയനുകളോട് അഭിപ്രായം തേടിയിരുന്നു.
എറണാകുളം മേഖലാ യൂണിയൻ പറയുന്നത് കർഷകർക്ക് ലിറ്ററിന് 60 രൂപ നൽകണമെന്നാണ്. എന്നാൽ കർഷകർക്ക് 60 രൂപ ലഭിക്കണമെങ്കിൽ, പാൽ വില അതിന് മുകളിൽ വർധിപ്പിക്കേണ്ടി വരും. അതിനാൽ അത്രയും വർധിപ്പിക്കാൻ കഴിയില്ലെന്ന് മിൽമ ഭരണസമിതി വ്യക്തമാക്കിയിരുന്നു.