അമ്പൂരി രാഖി കൊലക്കേസ്; പ്രതികളായ മൂന്നു പേര്‍ക്കും ജീവപര്യന്തം തടവുശിക്ഷ

അമ്പൂരി രാഖി കൊലക്കേസില്‍ മൂന്നു പ്രതികള്‍ക്കും ജീവപര്യന്തം തടവ്. പ്രതികളായ അഖില്‍, സഹോദരന്‍ രാഹുല്‍, സുഹൃത്ത് ആദര്‍ശ് എന്നിവരെയാണ് ശിക്ഷിച്ചത്. നെയ്യാറ്റിന്‍കര തിരുപുറം സ്വദേശിനിയായ രാഖിയെ കഴുത്തു ഞെരിച്ച് കൊലപ്പെടുത്തി മറവു ചെയ്യുകയായിരുന്നു.

2019 ജൂണ്‍ 21-നാണ് സംഭവം. സൈനികനായ അഖില്‍ വര്‍ഷങ്ങളായി രാഖിയുമായി പ്രണയത്തിലായിരുന്നു. ഇതിനിടെ ഇവര്‍ രഹസ്യമായി വിവാഹം കഴിച്ചിരുന്നു. അഖിലിനു മറ്റൊരു യുവതിയുമായി വീട്ടുകാര്‍ വിവാഹം ഉറപ്പിച്ചപ്പോള്‍ ഇതിനെച്ചൊല്ലി ഇരുവരും കലഹിച്ചിരുന്നു. പിന്നീട് അമ്പൂരിയില്‍ പുതുതായി പണിയുന്ന വീട് കാണിച്ചു കൊടുക്കാമെന്നു പറഞ്ഞ് രാഖിയെ പ്രതികള്‍ കാറില്‍ കയറ്റി കൊണ്ടുപോയി.

കാറില്‍വെച്ച് കഴുത്തു ഞെരിച്ച് കൊലപ്പെടുത്തിയശേഷം അഖിലിന്റെ വീടിനു സമീപം എടുത്ത കുഴിയില്‍ മൃതദേഹം മറവു ചെയ്തു. തുടര്‍ന്ന് അഖില്‍ ജോലി സ്ഥലത്തേക്കും മറ്റു പ്രതികള്‍ ഗുരുവായൂരിലേക്കും പോകുകയായിരുന്നു.