മൂന്നരവയസുകാരി ഫ്ളാറ്റിന്റെ ഏഴാം നിലയിൽ നിന്ന് വീണു മരിച്ചു

മുംബൈ വസായിൽ മൂന്നരവയസുകാരി ഫ്ളാറ്റിന്റെ ഏഴാം നിലയിലെ ബാൽക്കണിയിൽ നിന്ന് വീണു മരിച്ചു. അപകടം സ്മാർട്ട്ഫോണിൽ കളിക്കുന്നതിനിടെയായിരുന്നു. ശ്രേയമഹാജൻ എന്ന കുട്ടിയാണ് മരിച്ചത്. വസായ് വെസ്റ്റ് ഹെറിറ്റേജ്സിറ്റിയിലുള്ള റീജന്‍സിവില്ലയിലാണ് കുട്ടിയും കുടുംബവും താമസിക്കുന്നത്.

മൂത്തകുട്ടിയെ അമ്മ സ്കൂൾ ബസിൽ കയറ്റി വിടാൻ പുറത്തിറങ്ങിയ സമയത്തായിരുന്നു അപകടം. ഈ സമയത്ത് കുട്ടി ഉറക്കമെഴുന്നേറ്റ് മൊബൈലിൽ കളിക്കുകയായിരുന്നു. മൊബൈൽ താഴെ വീണത് എടുക്കാൻ ശ്രമിക്കുമ്പോഴായിരുന്നു അപകടം. കുട്ടി നാലടി ഉയരമുള്ള ഇരുമ്പഴിയിൽ പിടിച്ച് താഴേയ്ക്ക് ഇറങ്ങാൻ ശ്രമിക്കുമ്പോഴായിരുന്നു പിടിവിട്ട് വീണത്. സെക്യൂരിറ്റി ജീവനക്കാരൻ ശബ്ദം കേട്ട് ഓടിയെത്തി. അവിടെയുണ്ടായിരുന്ന ആളുകൾ ചേർന്ന് ആശുപത്രിയിൽ എത്തിച്ചുവെങ്കിലും മരണം സ്ഥിരീകരിച്ചു.

Content Highlights – girl falls from seventh floor