എ കെ ജി സെന്റര്‍ ആക്രമണം; പരിഹാസ്യ മറുപടിയുമായി ഇ പി ജയരാജൻ

എ കെ ജി സെന്റര്‍ ആക്രമണം നടന്നിട്ട് 12 ദിവസമായിട്ടും പ്രതികളെക്കുറിച്ച് സൂചനയില്ലല്ലോയെന്ന ചോദ്യത്തിന് വിചിത്ര മറുപടിയുമായി എൽ ഡി എഫ് കൺവീനർ ഇ പി ജയരാജൻ. സുകുമാരക്കുറുപ്പ് പോയിട്ട് കാലമെത്രയായി, പിടിച്ചോ? എന്ന മറുചോദ്യണ് ഇ പി ഉന്നയിച്ചത്. പലരും മാറിമാറി ഭരിച്ചില്ലേ. പിടിച്ചോ? എത്രയെത്ര കേസുകളുണ്ട് ഇങ്ങനെ?’, അദ്ദേഹം കണ്ണൂരില്‍ മാധ്യമ പ്രവർത്തകരോട് ചോദിച്ചു.

എ കെ ജി സെന്റര്‍ ആക്രമണം പോലീസ് നല്ലനിലയില്‍ അന്വേഷിക്കുന്നുണ്ട്. പിന്നെ, കക്കാന്‍ പഠിക്കുന്നവര്‍ക്കറിയാം എങ്ങനെ നിൽക്കണമെന്ന്. ഇത്തരത്തില്‍ കൃത്യങ്ങള്‍ നിര്‍വഹിക്കുന്നവര്‍ രക്ഷപ്പെടാനുള്ള വഴികളും സ്വീകരിക്കും, സ്വീകരിച്ചിട്ടുണ്ടാവാം. അതുകൊണ്ട് ശക്തിയും ബുദ്ധിപരമായ കഴിവും എല്ലാത്തരത്തിലുമുള്ള ശാസ്ത്രസാങ്കേതിക വിദ്യകളും ഉപയോഗിച്ചുകൊണ്ട് വളരെ ജാഗ്രതയോടെയാണ് പോലീസ് കേസ് അന്വേഷിക്കുന്നത് എന്നും ഇ പി ജയരാജന്‍ പറഞ്ഞു.

എ.കെ.ജി. സെന്റര്‍ ആക്രമണത്തിനു പിന്നില്‍ ജയരാജനാണെന്ന കെ.പി.സി.സി. അധ്യക്ഷന്‍ കെ. സുധാകരന്റെ ആരോപണത്തെ കുറിച്ച് ചോദിച്ചപ്പോൾ സുധാകരന് മറുപടി നൽകാൻ ആഗ്രഹിക്കുന്നില്ലെന്നും അത്രയും തരംതാഴാൻ കഴിയില്ലെന്നുമായിരുന്നു ഇ പി ജയരാജന്റെ പ്രതിരണം.

Content Highlights: AKG Center attack, EP Jayarajan, sarcastic reply,