വീണ്ടും കാട്ടുപോത്ത് ആക്രമണം; പൂയംകുട്ടിയില്‍ ഒരാള്‍ക്ക് ഗുരുതരമായി പരിക്കേറ്റു

സംസ്ഥാനത്ത് വീണ്ടും കാട്ടുപോത്ത് ആക്രമണം. പൂയംകുട്ടിയില്‍ കാട്ടുപോത്തിന്റെ ആക്രമണത്തില്‍ ഒരാള്‍ക്ക് ഗുരുതരമായി പരിക്കേറ്റു. ഉറിയംകൊട്ടി ആദിവാസി കോളനിയിലെ വേലപ്പനാണ് പരുക്കേറ്റത്. മഞ്ചപ്പാറ എന്ന സ്ഥലത്തുവച്ചാണ് കാട്ടുപോത്ത് ആക്രമിച്ചത്.

കഴിഞ്ഞ ദിവസം കാട്ടുപോത്തിന്റെ ആക്രമണത്തില്‍ സംസ്ഥാനത്ത് മൂന്നു പേര്‍ മരിച്ചിരുന്നു. എരുമേലി കണമലയില്‍ 2 പേരും കൊല്ലം ആയൂരില്‍ ഒരാളുമാണ് കൊല്ലപ്പെട്ടത്. കണമല അട്ടിവളവ് പ്ലാവനാക്കുഴി (പുന്നത്തുറ) തോമസ് ആന്റണി (63), പുറത്തേല്‍ ചാക്കോ (70), ആയൂര്‍ പെരിങ്ങള്ളൂര്‍ കൊടിഞ്ഞല്‍ കുന്നുവിള വീട്ടില്‍ സാമുവേല്‍ വര്‍ഗീസ് (രാജന്‍64) എന്നിവരാണു മരിച്ചത്.

ഇതേ ദിവസം തന്നെ ചാലക്കുടിയില്‍ കാട്ടുപോത്തിനെ കണ്ടിരുന്നു. വെട്ടുകടവിന് സമീപമായിരുന്നു സംഭവം. റോഡില്‍ നില്‍ക്കുകയായിരുന്ന കാട്ടുപോത്തിനെ കണ്ട് ഭയന്ന് ഒരു സ്‌കൂട്ടര്‍ യാത്രക്കാരന്‍ പെട്ടെന്ന് നിര്‍ത്തുകയും പിന്നിലെത്തിയ കാറിടിച്ച് യാത്രക്കാരന് പരിക്കേല്‍ക്കുകയും ചെയ്തിരുന്നു.