റിപ്പോര്‍ട്ടില്‍ നിന്ന് ഇ പി ജയരാജന്റെ പേര് ഒഴിവാക്കിയെന്ന് വി ഡി സതീശന്‍; ഇന്‍ഡിഗോ ദക്ഷിണേന്ത്യന്‍ മേധാവിക്ക് പരാതി നല്‍കി

വിമാനത്തില്‍ മുഖ്യമന്ത്രിക്കെതിരെ നടന്ന പ്രതിഷേധവുമായി ബന്ധപ്പെട്ട് ഇന്‍ഡിഗോ നല്‍കിയ റിപ്പോര്‍ട്ടില്‍ പരാതിയുമായി പ്രതിപക്ഷനേതാവ് വി ഡി സതീശന്‍. റിപ്പോര്‍ട്ടില്‍ നിന്നും ഇ പി ജയരാജന്റെ പേര് ഒഴിവാക്കിയതില്‍ ദുരൂഹതയുണ്ടെന്ന് കാട്ടി സതീശന്‍ പരാതി നല്‍കി. ഇന്‍ഡിഗോ ദക്ഷിണേന്ത്യന്‍ മേധാവിക്കാണ് പരാതി നല്‍കിയത്.

എയര്‍പോര്‍ട്ട് മാനേജര്‍ പോലീസിന് നല്‍കിയ റിപ്പോര്‍ട്ട് തെറ്റിദ്ധരിപ്പിക്കുന്നതാണ്. കണ്ണൂര്‍ സ്വദേശിയായ മാനേജര്‍ എയര്‍ലൈന്‍സിനെയും പോലീസിനെയും തെറ്റിദ്ധരിപ്പിച്ചു. എയര്‍പോര്‍ട്ട് മാനേജര്‍ക്കെതിരെ അന്വേഷണവും നടപടിയും വേണമെന്നും സതീശന്‍ പരാതിയില്‍ ആവശ്യപ്പെട്ടു. മുഖ്യമന്ത്രി വിമാനത്തിലുള്ളപ്പോളാണ് യൂത്ത് കോണ്‍ഗ്രസുകാര്‍ പ്രതിഷേധിച്ചതെന്ന് റിപ്പോര്‍ട്ടില്‍ പറയുന്നു.

ഇ പി ജയരാജന്റെ പേര് പരാമര്‍ശിക്കാതെയാണ് റിപ്പോര്‍ട്ടെന്ന് വാര്‍ത്തകള്‍ പുറത്തുവന്നിരുന്നു. മുദ്രാവാക്യം വിളിച്ചപ്പോള്‍ ഒപ്പമുള്ളയാള്‍ തടഞ്ഞെന്നാണ് റിപ്പോര്‍ട്ടിലുള്ളത്. മൂന്നു പേര്‍ മുദ്രാവാക്യങ്ങളുമായി പാഞ്ഞടുത്തുവെന്നും പോലീസിന് നല്‍കിയ റിപ്പോര്‍ട്ടില്‍ വ്യക്തമാക്കിയിട്ടുണ്ട്.

Content Highlights: Flight incident, E P Jayarajan, V D Satheeshan, Indigo, Report