തലശ്ശേരിയില്‍ കാറില്‍ ചാരി നിന്നതിന് ആറു വയസുകാരനെ ചവിട്ടിത്തെറിപ്പിച്ചു; യുവാവ് കസ്റ്റഡിയില്‍, വധശ്രമത്തിന് കേസ്

കാറില്‍ ചാരി നിന്നതിന് ആറു വയസുകാരനെ നടുവില്‍ ചവിട്ടിത്തറിപ്പിച്ച് ക്രൂരത. തലശ്ശേരിയില്‍ വ്യാഴാഴ്ച വൈകുന്നേരമാണ് സംഭവം. പ്രതിയായ പൊന്ന്യംപാലം സ്വദേശി ശിഹ്ഷാദിനെ പോലീസ് കസ്റ്റഡിയില്‍ എടുത്തു. രാജസ്ഥാന്‍ സ്വദേശിയായ ഗണേഷ് എന്ന കുട്ടിയെയാണ് ഇയാള്‍ ചവിട്ടിത്തെറിപ്പിച്ചത്.

കാറില്‍ ചാരി നിന്ന കുട്ടിയെ യാതൊരു പ്രകോപനവുമില്ലാതെ ഇയാള്‍ ചവിട്ടുകയായിരുന്നു. സംഭവത്തിന്റെ വീഡിയോ സോഷ്യല്‍ മീഡിയയില്‍ പ്രചരിച്ചതോടൊണ് പോലീസ് കേസെടുത്തത്. പ്രതി സഞ്ചരിച്ച കാറും കസ്റ്റഡിയില്‍ എടുത്തിട്ടുണ്ട്.
പ്രതിക്കെതിരെ വധശ്രമം ഉള്‍പ്പെടെയുള്ള വകുപ്പുകള്‍ ചേര്‍ത്ത് കേസെടുത്തിട്ടുണ്ട്.

ദൃശ്യങ്ങള്‍ പുറത്തു വന്നതിനു ശേഷം പത്തുമണിക്കൂര്‍ പിന്നിട്ടിട്ടും പോലീസ് കേസെടുക്കാന്‍ തയ്യാറായിരുന്നില്ല. വ്യാപക പ്രതിഷേധം ഉയര്‍ന്നതിന് ശേഷമാണ് കേസെടുത്തത്. ശിഹ്ഷാദിന്റെ ചവിട്ടില്‍ നടുവിന് പരിക്കേറ്റ കുട്ടി തലശ്ശേരി ജനറല്‍ ആശുപത്രിയില്‍ ചികിത്സയിലാണ്

രാജസ്ഥാനില്‍ നിന്ന് കേരളത്തില്‍ ജോലി തേടിയെത്തിയതാണ് കുട്ടിയുടെ മാതാപിതാക്കള്‍. സംഭവത്തില്‍ സ്വമേധയാ കേസെടുക്കുമെന്നും പോലീസിനോട് വിശദീകരണം ചോദിക്കുമെന്നും സംസ്ഥാന ബാലാവകാശ കമ്മീഷന്‍ അറിയിച്ചു.