യാത്രക്കാരിയോട് മോശമായി പെരുമാറി; ടിടിഇയെ റെയില്‍വേ പോലീസ് അറസ്റ്റ് ചെയ്തു

യാത്രക്കാരിയോട് മോശമായി പെരുമാറിയ ടിടിഇയെ റെയില്‍വേ പോലീസ് അറസ്റ്റ് ചെയ്തു. നിലമ്പൂര്‍-കൊച്ചുവേളി രാജ്യറാണി എക്‌സ്പ്രസിലാണ് സംഭവം. തിരുവനന്തപുരം സ്വദേശി നിധീഷാണ് പിടിയിലായത്. ആലുവ കഴിഞ്ഞപ്പോള്‍ ടിടിഇ മോശമായി പെരുമാറിയെന്നാണ് പരാതി. കോട്ടയം റെയില്‍വേ പോലീസാണ് ഇയാളെ അറസ്റ്റ് ചെയ്തത്.

നിധീഷ് മദ്യലഹരിയിലായിരുന്നുവെന്ന് പരിശോധനയില്‍ വ്യക്തമായി. എസ്-4 കോച്ചില്‍ യാത്ര ചെയ്യുകയായിരുന്ന യുവതിയോട് എ.സി. കോച്ചിലേക്ക് മാറാമെന്ന് നിധീഷ് പറഞ്ഞു. മാറാന്‍ യുവതി തയ്യാറാവാതിരുന്നതോടെ ഇയാള്‍ കൈയില്‍പ്പിടിച്ച് കൊണ്ടുപോകാന്‍ ശ്രമം നടത്തിയെന്നാണ് യുവതി പരാതിയില്‍ പറയുന്നത്.

നിലമ്പൂരില്‍ നിന്ന് കൊച്ചുവേളിയിലേക്കുള്ള യാത്രയ്ക്കിടെയായിരുന്നു സംഭവം. അറസ്റ്റിലായ നിധീഷിനെ കോടതിയില്‍ ഹാജരാക്കും.