പെണ്‍കുട്ടിക്ക് നേരെ ട്രെയിനില്‍ ലൈംഗികാതിക്രമം; രണ്ടു പ്രതികള്‍ പിടിയില്‍
News Desk
Posted On June 30, 2022
പെണ്‍കുട്ടിക്കു നേരെ ട്രെയിനില്‍ ലൈംഗികാതിക്രമമുണ്ടായ കേസില്‍ രണ്ടു പ്രതികള്‍ അറസ്റ്റില്‍. ചാലക്കുടി സ്വദേശികളായ ജോയ്, സിജോ എന്നിവരാണ് പിടിയിലായത്. കേസിലെ ഒന്നും മൂന്നും പ്രതികളാണ് ഇവര്‍. എറണാകുളം റെയില്‍വേ പോലീസിനാണ് അന്വേഷണച്ചുമതല. അഞ്ചു പേരാണ് കേസിലെ പ്രതികള്‍. മറ്റുള്ളവര്‍ക്കായി അന്വേഷണം തുടരുകയാണ്.
ശനിയാഴ്ച രാത്രിയാണ് എറണാകുളം-ഗുരുവായൂര്‍ സ്പെഷ്യല്‍ ട്രെയിനില്‍ വെച്ച് പെണ്‍കുട്ടി ആക്രമണത്തിന് ഇരയായത്. രാത്രി 7.50ഓടെയായിരുന്നു സംഭവം. എറണാകുളം നോര്‍ത്ത് സ്റ്റേഷന്‍ പിന്നിട്ടതോടെ അക്രമികള്‍ പെണ്‍കുട്ടിയുടെ അടുത്തെത്തി ശരീരത്ത് പിടിക്കാന്‍ ശ്രമിക്കുകയും അശ്ലീല ഭാഷയില്‍ സംസാരിക്കുകയും ചെയ്തു. തടയാന്‍ ശ്രമിച്ച പിതാവിനെയും യാത്രക്കാരനായ യുവാവിനെയും സംഘം കയ്യേറ്റം ചെയ്തു. മലപ്പുറം സ്വദേശിയായ യുവാവിനെയാണ് അക്രമം തടയാന്‍ ശ്രമിച്ചതിന് സംഘം കയ്യേറ്റം ചെയ്തത്.
പോക്‌സോ വകുപ്പുകള്‍ അനുസരിച്ചാണ് പ്രതികള്‍ക്കെതിരെ കേസെടുത്തിരിക്കുന്നത്. സീസണ്‍ ടിക്കറ്റ് യാത്രക്കാരാണ് ഇവര്‍ എല്ലാവരുമെന്നാണ് നിഗമനം. പ്രതികളില്‍ ചിലര്‍ അന്‍പത് വയസിനു മേല്‍ പ്രായമുള്ളവരാണ്.
Content Highlights: Train, Molestation, POCSO, Season Ticket
Trending Now
