നിന്നുകൊണ്ട് ഡ്രൈവിംഗ്, ഇടയില്‍ നൃത്തം; ടൂറിസ്റ്റ് ബസ് ഡ്രൈവര്‍ ജോമോന്റെ വീഡിയോ പുറത്ത്

ടൂറിസ്റ്റ് ബസ് നിന്നുകൊണ്ട് ഓടിക്കുകയും ഡ്രൈവിംഗിനിടയില്‍ നൃത്തം ചെയ്യുകയും ചെയ്യുന്ന ജോമോന്റെ വീഡിയോ പുറത്ത്. വടക്കഞ്ചേരിയില്‍ അപകടമുണ്ടാക്കിയ ജോമോന്‍ സുഹൃത്തുക്കള്‍ക്കൊപ്പം ഡാന്‍സ് ചെയ്തുകൊണ്ട് ബസോടിക്കുന്ന ദൃശ്യങ്ങളാണ് പുറത്തുവന്നത്. ഏതു ബസ് ഡ്രൈവ് ചെയ്തുകൊണ്ടാണ് നൃത്തമെന്ന കാര്യത്തില്‍ വ്യക്തതയില്ല. വടക്കഞ്ചേരി അപകടത്തില്‍ അറസ്റ്റിലായ ജോമോനെതിരെ നരഹത്യക്കുറ്റം ചുമത്തി പോലീസ് കേസെടുത്തിട്ടുണ്ട്.

മുളന്തുരുത്തി വെട്ടിക്കല്‍ മാര്‍ ബസേലിയസ് വിദ്യാനികേതന്‍ സ്‌കൂളിലെ വിദ്യാര്‍ത്ഥികളുമായി വിനോദയാത്രയ്ക്ക് പോകുന്നതിനിടെയാണ് വടക്കഞ്ചേരിയില്‍ വെച്ച് ജോമോന്‍ ഡ്രൈവ് ചെയ്ത ബസ് അപകടത്തില്‍ പെട്ട് ഒന്‍പത് പേര്‍ കൊല്ലപ്പെട്ടത്. അഞ്ച് വിദ്യാര്‍ത്ഥികളും ഒരു അധ്യാപകനും ടൂറിസ്റ്റ് ബസ് പാഞ്ഞു കയറിയ കെഎസ്ആര്‍ടിസി സൂപ്പര്‍ ഫാസ്റ്റിലെ യാത്രക്കാരായ മൂന്നു പേരുമാണ് കൊല്ലപ്പെട്ടത്.

അപകടത്തിനു ശേഷം ടൂര്‍ ഓപ്പറേറ്ററാണെന്ന് പറഞ്ഞ് സ്ഥലത്തു നിന്ന് മുങ്ങിയ ജോമോനെ ഇന്നലെ വൈകുന്നേരമാണ് കസ്റ്റഡിയില്‍ എടുത്തത്. വെള്ളിയാഴ്ച പുലര്‍ച്ചെ ഇയാളുടെ അറസ്റ്റ് രേഖപ്പെടുത്തി. ഇയാള്‍ മദ്യപിച്ചിരുന്നോ എന്ന് അറിയുന്നതിനായി രക്ത സാംപിള്‍ പരിശോധനയ്ക്ക് അയച്ചിരിക്കുകയാണ്.