സുരക്ഷാസേനയുമായി ഏറ്റുമുട്ടല്‍; ഛത്തീസ്ഗഡില്‍ ഏഴ് മാവോയിസ്റ്റുകള്‍ കൊല്ലപ്പെട്ടു

ഛത്തീസ്ഗഡില്‍ സുരക്ഷാസേനയുമായുണ്ടായ ഏറ്റുമുട്ടലില്‍ കൊല്ലപ്പെട്ട മാവോയിസ്റ്റുകളുടെ എണ്ണം ഏഴായി. ഛത്തീസ്ഗഡിലെ നാരായണ്‍പുർ ജില്ലയിലെ ഓർക്കാ മേഖലയിലെ ഗോബല്‍, തുല്‍ത്തുലി ഗ്രാമങ്ങള്‍ക്ക് സമീപമുള്ള വനത്തിലാണ് ഏറ്റുമുട്ടലുണ്ടായത്.

വെടിവയ്പില്‍ മൂന്ന് സുരക്ഷ ഉദ്യോഗസ്ഥർക്കും പരിക്കേറ്റു. രഹസ്യവിവരം ലഭിച്ചതിനെ തുടർന്ന് പോലീസും ഇൻഡോ-ടിബറ്റൻ ബോർഡർ പോലീസും ചേർന്ന് നക്സല്‍ വേട്ടക്കിറങ്ങുകയായിരുന്നു.

ഏറ്റുമുട്ടലിനുശേഷം നടത്തിയ പരിശോധനയിലാണ് യൂണിഫോം ധാരികളായ ഏഴ് നക്സലൈറ്റുകളുടെ മൃതദേഹം കണ്ടെത്തിയത്. ഇവരെ തിരിച്ചറിഞ്ഞിട്ടില്ല. സംഭവസ്ഥലത്തുനിന്ന് ആയുധങ്ങളും കണ്ടെടുത്തു.