ഹോളി ആഘോഷത്തിനിടെ മുസ്ലീം കുടുബത്തിനെതിരെ അതിക്രമം; തടഞ്ഞ് നിര്‍ത്തി ചായം ഒഴിച്ചു

ഉത്തർപ്രദേശിലെ ബിജ്നൂരില്‍ ഹോളി ആഘോഷത്തിന്റെ മറവില്‍ മുസ്ലീം കുടുംബത്തിന് നേരെ അതിക്രമം. ഒരു കൂട്ടം യുവാക്കള്‍ മൂന്നംഗ കുടുംബം സഞ്ചരിച്ച ബൈക്ക് തടഞ്ഞ് നിർത്തി ഇവർക്ക് മേല്‍ ചായം ഒഴുക്കുകയായിരുന്നു.

ഇതിന്റെ വീഡിയോ ദൃശ്യങ്ങള്‍ സോഷ്യല്‍ മീഡിയയിലൂടെ പ്രചരിക്കുന്നുണ്ട്. സംഭവത്തില്‍ പോലീസ് കേസെടുത്തു. ബിജ്നൂരിലെ ദാംപൂരിലാണ് സംഭവം. ബുധനാഴ്ചയാണ് അതിക്രമം നടന്നതെന്ന് പോലീസ് പറയുന്നു.ജയ് ശ്രീം വിളിച്ച്‌ കൊണ്ടാണ് യുവാക്കളുടെ അതിക്രമം. ഒരു പുരുഷനും രണ്ട് സ്ത്രീകളുമാണ് ബൈക്കില്‍ ഉള്ളത്. ഇവരെ തടഞ്ഞ് നിർത്തിയ യുവാക്കള്‍ ചായം കലക്കിയ വെള്ളം ഇവരുടെ ദേഹത്തേക്ക് ഒഴിക്കുന്നത് വീഡിയോയില്‍ കാണാം. ഇതിനെ ഇവർ ചോദ്യം ചെയ്തെങ്കിലും യുവാക്കള്‍ പിൻമാറിയില്ലെന്ന് മാത്രമല്ല സ്ത്രീകളിലൊരാളുടേയും പുരുഷൻറേയും മുഖത്ത് ചായം തേക്കുകയും ചെയ്തു.