ഏഷ്യാ കപ്പിന് ഇന്ന് തുടക്കം

ദുബായിയിൽ ഏഷ്യാ കപ്പ് ക്രിക്കറ്റ് ടൂർണമെന്‍റിന് ഇന്ന് തുടക്കമാകും. ദുബായ് രാജ്യാന്തര സ്റ്റേഡിയത്തില്‍ ശ്രീലങ്കയും അഫ്‌ഗാനിസ്ഥാനും തമ്മിലാണ് ഉദ്ഘാടന മത്സരം. ഇന്ന് രാത്രി ഏഴരയ്ക്കാണ് കളി തുടങ്ങുക. ഞായറാഴ്ചയാണ് ഇന്ത്യ-പാകിസ്ഥാൻ പോരാട്ടം.

ആറ് ടീമുകളാണ് ഏഷ്യാ കപ്പ് ലക്ഷ്യമിട്ട് മത്സരിക്കുക. ഇതിൽ ഇന്ത്യ, പാകിസ്ഥാൻ, ഹോങ്കോങ് എ ഗ്രൂപ്പിൽ വരും. ശ്രീലങ്ക, ബംഗ്ലാദേശ്, അഫ്ഗാൻ ബി ഗ്രൂപ്പിലും. ഓരോ ഗ്രൂപ്പിൽ നിന്നും രണ്ട് ടീമുകൾ വീതം സൂപ്പർ ഫോറിലേക്കെത്തും. അവിടെ പരസ്പരമാകും മത്സരിക്കുക. മുന്നിലെത്തുന്ന രണ്ട് ടീമുകൾ ഫൈനലിലെത്തും.

നിലവിലെ ചാമ്പ്യൻമാരായ ഇന്ത്യ തന്നെയാണ് കൂട്ടത്തിലെ കരുത്തർ. രോഹിത് ശര്‍മ്മയും കെ എല്‍ രാഹുലും സൂര്യകുമാർ യാദവും റിഷഭ് പന്തും അടങ്ങിയ ബാറ്റിംഗ് നിര വളരെ ശക്തമാണ്. ട്വന്‍റി 20 ലോകകപ്പിന് മുന്നോടിയായി വിരാട് കോലിക്ക് ബാറ്റിംഗ് ഫോം വീണ്ടെടുക്കാനുള്ള അവസരം കൂടിയാകും ഇത്. കഴിഞ്ഞ രണ്ട് ഏഷ്യ കപ്പിലും ഇന്ത്യ കിരീടം നേടിയിരുന്നു. രണ്ടുവട്ടവും ഫൈനലില്‍ തോല്‍പ്പിച്ചത് ബംഗ്ലാദേശിനെയാണ്.

Content highlights – Asia cup, india, 6 teams