സയ്യിദ് മുഷ്താഖ് അലി ടി20 ടൂര്ണമെന്റില് മുംബൈയെ അട്ടിമറിച്ച് കേരളം. മുംബൈക്കെതിരെ 15 റണ്സിൻറെ ജയമാണ് കേരളം നേടിയത്. സൂര്യകുമാര് യാദവ്, അജിങ്ക്യ രഹാനെ, ശിവം ദുബെ, സര്ഫറാസ് ഖാന്, ശാര്ദുല് താക്കൂര് എന്നിവരടങ്ങിയ ടീമിനെയാണ് കേരളം അട്ടിമറിച്ചത്. 28 പന്തില് നിന്ന് ഒരു സിക്സും എട്ട് ഫോറുമടക്കം 46 റണ്സെടുത്ത ക്യാപ്റ്റന് സഞ്ജു സാംസണാണ് കേരളത്തിന്റെ ടോപ് സ്കോറര്.
ടോസ് നേടി ബാറ്റിങ്ങിനിറങ്ങിയ കേരളം 20 ഓവറില് അഞ്ചു വിക്കറ്റ് നഷ്ടത്തില് 178 റണ്സെടുത്തു. മറുപടി ബാറ്റിങ്ങിനിറങ്ങിയ മുംബൈ 19.4 ഓവറില് 163 റണ്സിന് ഓള്ഔട്ടാകുകയായിരുന്നു. 3.4 ഓവറില് 24 റണ്സിന് അഞ്ചു വിക്കറ്റ് നേടിയ കെ.എം ആസിഫാണ് മുംബൈയെ തകര്ത്തത്. വിഗ്നേഷ് പുത്തൂര് രണ്ടു വിക്കറ്റെടുത്തു. ഷറഫുദ്ദീന്, എം.ഡി നിധീഷ്, അബ്ദുള് ബാസിത് എന്നിവര് ഓരോ വിക്കറ്റ് വീതം വീഴ്ത്തി
40 പന്തില് നിന്ന് ഒരു സിക്സും എട്ട് ഫോറുമടക്കം 52 റണ്സെടുത്ത സര്ഫറാസ് ഖാനാണ് മുംബൈയുടെ ടോപ് സ്കോറര്. ഒരു ഓവറില് സൂര്യകുമാര് യാദവ് (25 പന്തില് 32) ഉള്പ്പെടെ മൂന്ന് പേരെ പുറത്താക്കി കെ എം ആസിഫാണ് വിജയം അനായാസമാക്കിയത്.
Trending Now
You may also like
