സംസ്ഥാന സ്കൂള്‍ കായികമേള പുരോഗമിക്കുന്നു, ഇൻക്ലൂസീവ് സ്പോര്‍ട്സ് വിഭാഗത്തില്‍ തിരുവനന്തപുരം ചാമ്ബ്യന്മാര്‍

സംസ്ഥാന സ്കൂള്‍ കായികമേളയില്‍ സവിശേഷ പരിഗണന അർഹിക്കുന്നവരുടെ വിഭാഗത്തില്‍ തിരുവനന്തപുരം ചാമ്ബ്യന്മാർ. പാലക്കാട് ജില്ല രണ്ടാം സ്ഥാനവും കോഴിക്കോട് മൂന്നാം സ്ഥാനവും നേടി.

ഇൻക്ലൂസീവ് സ്പോർട്സ് വിഭാഗത്തില്‍ വിവിധ അത്‌ലറ്റിക്സ്, ഗെയിംസ് ഇനങ്ങളിലാണ് കുട്ടികള്‍ മത്സരിച്ചത്. പെണ്‍കുട്ടികള്‍ക്കുള്ള ഹാൻഡ് ബോള്‍, ആണ്‍കുട്ടികള്‍ക്കുള്ള ഫുട്ബോള്‍, മിക്സഡ് ബാഡ്മിൻ്റൻ, മിക്സഡ് റിലേ, കാഴ്ച പരിമിതർക്കുള്ള 100 മീറ്റർ ഓട്ടം, മിക്സഡ് സ്റ്റാൻഡിംഗ് ത്രോ എന്നീ ഇനങ്ങളില്‍ 14 ജില്ലകളില്‍ നിന്നുള്ള 1600 ലധികം കായിക താരങ്ങളാണ് മാറ്റുരച്ചത്.

സമഗ്ര ശിക്ഷാ കേരളയുടെ നേതൃത്വത്തില്‍ ജില്ലാതല പരിശീലനം ലഭിച്ച കുട്ടികളാണു സംസ്ഥാന കായിക മേളയില്‍ പങ്കെടുത്തത്. സവിശേഷ പരിഗണന അർഹിക്കുന്ന കുട്ടികളെ ചേർത്തുനിർത്തി ചരിത്രത്തിലേക്ക് ചുവടുവെക്കുകയാണ് ഒളിമ്ബിക്‌സ് മാതൃകയിലെ ആദ്യ സ്‌കൂള്‍ കായികമേള.