ഓഗസ്റ്റ് 2 മുതൽ 15 വരെ എല്ലാവരും സാമൂഹിക മാധ്യമ അക്കൗണ്ടുകളുടെ പ്രൊഫൈൽ ചിത്രം ത്രിവര്‍ണ്ണമാക്കണമെന്ന് പ്രധാനമന്ത്രി

എല്ലാവരും സാമൂഹിക മാധ്യമ അക്കൗണ്ടുകളുടെ പ്രൊഫൈൽ ചിത്രം ഓഗസ്റ്റ് 2 മുതൽ 15 വരെയുള്ള ദിവസങ്ങളിൽ ത്രിവര്‍ണ്ണമാക്കണമെന്ന് പ്രധാനമന്ത്രി നരേന്ദ്ര മോദി. ‘ഹര്‍ ഖര്‍ തിരംഗ’ ക്യാംമ്പെയിന്റെ ഭാഗമായാണ് 75-ാം സ്വാതന്ത്ര്യ ദിനത്തോടനുബന്ധിച്ചുള്ള മോദിയുടെ നിര്‍ദേശം. പ്രധാനമന്ത്രിയുടെ പ്രതിമാസ റേഡിയോ പരിപാടിയായ മന്‍കീ ബാത്തിലൂടെയാണ് അദ്ദേഹം ആഭ്യര്‍ഥന നടത്തിയത്.

‘ത്രിവര്‍ണ്ണവുമായി ഓഗസ്റ്റ് രണ്ടിന് പ്രത്യേക ബന്ധമുണ്ട്. അന്ന് നമ്മുടെ ദേശീയ പതാക രൂപകല്‍പ്പന ചെയ്ത പിംഗളി വെങ്കയ്യയുടെ ജന്‍മദിനമാണ്. അദ്ദേഹത്തിന് ആദരമര്‍പ്പിക്കുന്നു. ഈ അവസരത്തില്‍ വലിയ വിപ്ലവകാരിയായ മാഡം കാമയേയും ഓര്‍ക്കുന്നു.’ – മോദി പറഞ്ഞു.

ഓഗസ്റ്റ് 13 മുതല്‍ 15 വരെ സ്വാതന്ത്ര്യ ദിനത്തോട് അനുബന്ധിച്ച് എല്ലാവരും വീടുകളില്‍ ത്രിവര്‍ണ്ണ പതാക ഉയര്‍ത്താനും നേരത്തെ പ്രധാനമന്ത്രി നിര്‍ദേശിച്ചിരുന്നു. സാമൂഹിക മാധ്യമങ്ങളിലെ പ്രൊഫൈല്‍ ചിത്രം മാറ്റാനുള്ള നിര്‍ദേശവും ഇതിനുപിന്നാലെയാണ് മോദി മുന്നോട്ടുവച്ചത്.

Content Highlights – Prime minister, Narendra Modi, Social Media Accounts, Tricolor