നേപ്പാളില്‍ തകര്‍ന്ന വിമാനത്തിലെ യാത്രക്കാരുടെ മൃതദേഹങ്ങള്‍ കണ്ടെത്തി
News Desk
Posted On May 30, 2022
നേപ്പാളില്‍ തകര്‍ന്നു വീണ വിമാനത്തിലെ യാത്രക്കാരുടെ മൃതദേഹങ്ങള്‍ കണ്ടെത്തി. മുസ്തങ് ജില്ലയിലെ കോവാങ്ങിലാണ് വിമാനം തകര്‍ന്നു വീണത്. വിമാനം തകര്‍ന്നുവീണ പ്രദേശം കണ്ടെത്തിയെങ്കിലും രക്ഷാപ്രവര്‍ത്തകര്‍ക്ക് അവിടേക്ക് എത്താന്‍ കഴിഞ്ഞിരുന്നില്ല. കണ്ടെത്തിയ മൃതദേഹങ്ങള്‍ പലതും തിരിച്ചറിയാന്‍ കഴിയാത്ത അവസ്ഥയിലാണെന്നാണ് റിപ്പോര്‍ട്ട്.
ജീവനക്കാരുള്‍പ്പെടെ 22 പേരുമായാണ് താര എയറിന്റെ വിമാനം തകര്‍ന്നു വീണത്. യാത്രക്കാരില്‍ നാലു പേര്‍ ഇന്ത്യക്കാരാണ്. ഇവര്‍ ഒരു കുടുംബത്തിലെ അംഗങ്ങളാണ്. പൊഖ്രയില്‍ നിന്ന് ജോംസോമിലേക്കുള്ള യാത്രാ മധ്യേയാണ് വിമാനം അപകടത്തില്‍ പെട്ടത്. ഞായറാഴ്ച അപകട സ്ഥലത്ത് തെരച്ചിലിന് ശ്രമം നടത്തിയെങ്കിലും കനത്ത മഞ്ഞുവീഴ്ച മൂലം രാത്രിയോടെ അവസാനിപ്പിക്കുകയായിരുന്നു.
തിങ്കളാഴ്ച രാവിലെ തെരച്ചില്‍ പുനരാരംഭിച്ചതോടെയാണ് വിമാനാവശിഷ്ടങ്ങളും പിന്നീട് മൃതദേഹങ്ങളും കണ്ടെത്തിയത്. വിമാനാവശിഷ്ടങ്ങളുടെ ചിത്രങ്ങള്‍ നേപ്പാള്‍ സൈന്യം പുറത്തു വിട്ടിരുന്നു.
Conrtent Highlights: Nepal Plane Crash, Tara Airlines, Crash, Death, Indian Family
