വിമതപക്ഷത്തു നിന്ന് ഉദ്ധവ് ക്യാമ്പില്‍ മടങ്ങിയെത്തി ശിവസേന എംഎല്‍എ നിതിന്‍ ദേശ്മുഖ്; തന്നെ തട്ടിക്കൊണ്ടുപോയതെന്ന് വിശദീകരണം

വിമതപക്ഷത്തിനെതിരെ ഗുരുതര ആരോപണം ഉന്നയിച്ച് ഉദ്ധവ് ക്യാമ്പില്‍ തിരികെയെത്തിയ ശിവസേന എംഎല്‍എ നിതിന്‍ ദേശ്മുഖ്. തന്നെ സൂറത്തിലേക്ക് തട്ടിക്കൊണ്ടു പോകുകയായിരുന്നു. പുലര്‍ച്ചെ മൂന്നു മണിയോടെ റിസോര്‍ട്ടില്‍ നിന്ന് രക്ഷപ്പെട്ട് ഏതെങ്കിലും വാഹനത്തില്‍ കയറി രക്ഷപ്പെടാന്‍ ശ്രമിക്കുമ്പോള്‍ നൂറിലേറെ പോലീസുകാര്‍ തന്നെ വളഞ്ഞുവെന്നും ബലമായി ആശുപത്രിയിലേക്ക് കൊണ്ടുപോയെന്നും ദേശ്മുഖ് പറഞ്ഞു.

തനിക്ക് ഹൃദയാഘാതമുണ്ടായെന്നു പറഞ്ഞ് ബലമായി ചികിത്സ നടത്താനാണ് അവര്‍ ശ്രമിച്ചത്. ബലം പ്രയോഗിച്ച് ചില മരുന്നുകള്‍ തന്റെ ശരീരത്തില്‍ കുത്തിവെച്ചുവെന്നും ദേശ്മുഖ് പറഞ്ഞു. താന്‍ എന്നും ഉദ്ധവ് താക്കറേയ്‌ക്കൊപ്പമാണെന്ന് ദേശ്മുഖ് മാധ്യമപ്രവര്‍ത്തകരോട് പറഞ്ഞു.

ദേശ്മുഖിനെ കാണാനില്ലെന്നും അദ്ദേഹത്തിന്റെ ജീവന്‍ അപകടത്തിലാണെന്നും കാട്ടി ഭാര്യ ചൊവ്വാഴ്ച പോലീസില്‍ പരാതി നല്‍കിയിരുന്നു. ബാലപൂര്‍ നിയമസഭാ മണ്ഡലത്തില്‍ നിന്നുള്ള നിയമസഭാംഗമാണ് നിതിന്‍ ദേശ്മുഖ്.

Content Highlights: Siv Sena, Udhav Thackeray, Nithin Deshmukh, Rebel