ആക്ഷന്‍ ഹീറോ ബിജുവിലെ വില്ലന്‍ നടനെ തൂങ്ങിമരിച്ച നിലയില്‍ കണ്ടെത്തി

ഏബ്രിഡ് ഷൈന്‍ സംവിധാനം ചെയ്ത നിവിന്‍ പോളി ചിത്രം ആക്ഷന്‍ ഹീറോ ബിജുവില്‍ വില്ലന്‍ വേഷത്തിലെത്തിയ നടനെ മരിച്ച നിലയില്‍ കണ്ടെത്തി. കളമശ്ശേരി കാവുങ്ങല്‍പറമ്പില്‍ വീട്ടില്‍ എന്‍ ഡി പ്രസാദിനെയാണ് വീടിനു മുന്നില്‍ തൂങ്ങിമരിച്ച നിലയില്‍ കണ്ടെത്തിയത്. ഞായറാഴ്ച വൈകിട്ടാണ് സംഭവം.

നിരവധി കേസുകളില്‍ പ്രതിയാണ് ഇയാളെന്ന് പോലീസ് അറിയിച്ചു. കുടുംബപ്രശ്‌നങ്ങളും മാനസിക പ്രശ്‌നങ്ങളുമായിരിക്കാം ആത്മഹത്യക്ക് കാരണമെന്നും പോലീസ് വ്യക്തമാക്കി. മയക്കുമരുന്ന്, ഗുണ്ടാ മാഫിയകളെ നേരിടുന്നതിനായി കൊച്ചി സിറ്റി പോലീസ് നടപ്പാക്കിയ ഓപ്പറേഷന്‍ കിംഗ് കോബ്രയുടെ ഭാഗമായി ആദ്യദിനം കസ്റ്റഡിയില്‍ എടുത്തവരില്‍ പ്രസാദും ഉള്‍പ്പെട്ടിരുന്നു.

40 പേരെയാണ് ആദ്യ ദിനത്തില്‍ കസ്റ്റഡിയില്‍ എടുത്തത്. ആക്ഷന്‍ ഹീറോ ബിജുവിന് പുറമേ ഇബ, കര്‍മാനി എന്നീ ചിത്രങ്ങളിലും അഭിനയിച്ചിട്ടുണ്ട്. ഭാര്യയും രണ്ടു കുട്ടികളുമുണ്ട്.

Content Highlight: Suicide, Action Hero Biju, Prasad, Actor