കോതമംഗലത്തെ സ്വകാര്യ സ്‌കൂളില്‍ കഞ്ചാവു വില്‍പന; വാങ്ങാനെത്തിയ യുവാക്കള്‍ പിടിയില്‍

കോതമംഗലത്ത് സ്വകാര്യ സ്‌കൂളിലെ സുരക്ഷാ ജീവനക്കാരുടെ ഓഫീസില്‍ കഞ്ചാവു വില്‍പന. എക്‌സൈസ് നടത്തിയ പരിശോധനയില്‍ കഞ്ചാവ് പിടിച്ചെടുത്തു. എക്‌സൈസ് സംഘത്തെ കണ്ട് സുരക്ഷാ ജീവനക്കാരനായ സാജു ബിജു ഓടി രക്ഷപ്പെട്ടു. ഇയാളില്‍ നിന്ന് കഞ്ചാവ് വാങ്ങാനെത്തിയ അഞ്ച് യുവാക്കള്‍ പിടിയിലായി. വടാട്ടുപാറ സ്വദേശികളാണ് പിടിയിലായത്. നെല്ലിക്കുഴി ഗ്രീന്‍വാലി സ്‌കൂളിലാണ് സംഭവം.

സാജു സ്‌കൂള്‍ കേന്ദ്രീകരിച്ച് കഞ്ചാവു വില്‍പന നടത്തുന്നതായി വിവരം ലഭിച്ചതിന്റെ അടിസ്ഥാനത്തിലാണ് പരിശോധന നടത്തിയത്. സ്‌കൂളിലെ സെക്യൂരിറ്റി മുറിയില്‍ തന്നെ താമസിച്ചിരുന്ന ഇയാളില്‍ നിന്ന് കഞ്ചാവു വാങ്ങാന്‍ രാത്രി സമയങ്ങളില്‍ പലരും എത്തിയിരുന്നുവെന്നാണ് എക്‌സൈസ് നല്‍കുന്ന വിവരം. സ്‌കൂള്‍ വിദ്യാര്‍ഥികള്‍ക്കും കഞ്ചാവ് വിറ്റിരുന്നതായും സംശയമുണ്ട്.

രക്ഷപ്പെട്ട സാജുവിനെ കണ്ടെത്താനായി എക്സൈസ് സംഘം പോലീസിന്റെ സഹായം തേടിയിട്ടുണ്ട്. ലഹരി ഉപയോഗവും ലഹരി അനുബന്ധ കുറ്റകൃത്യങ്ങളും വര്‍ദ്ധിച്ചു വരുന്ന സാഹചര്യത്തില്‍ എക്‌സൈസും പോലീസ് പരിശോധനകള്‍ ശക്തമാക്കിയിരുന്നു. ഇതിനിടെയാണ് സ്‌കൂള്‍ ജീവനക്കാരുടെ കഞ്ചാവു വില്‍പന പിടികൂടുന്നത്.