വീടിന്റെ മുകളില്‍ നിന്ന് ഗേറ്റിലേക്ക് വീണു; കമ്പി തുളഞ്ഞു കയറി ഇതര സംസ്ഥാന തൊഴിലാളി മരിച്ചു

എറണാകുളത്ത് വീടിന്റെ മുകള്‍നിലയില്‍ നിന്ന് ഗേറ്റിലേക്ക് വീണ് കമ്പി തുളഞ്ഞു കയറി ഇതര സംസ്ഥാന തൊഴിലാളി മരിച്ചു. ഒഡിഷ സ്വദേശി കാലു നായക്(18) ആണ് മരിച്ചത്. പോണേക്കരയിലാണ് സംഭവം. ഇയാള്‍ വാടകയ്ക്ക് താമസിച്ചിരുന്ന വീടിന്റെ മുകള്‍ നിലയില്‍ നിന്നാണ് വീണത്.

ഞായറാഴ്ച രാത്രി 12 മണിയോടെയായിരുന്നു സംഭവം. പോണേക്കര കരയില്‍ മനയ്ക്കപ്പറമ്പ് കൃഷ്ണനഗര്‍ റോഡില്‍ വീടിന്റെ ടെറസില്‍ നിന്ന് യുവാവ് താഴേയ്ക്ക് വീഴുകയായിരുന്നു. കാല്‍ വഴുതി വീണതാണെന്നാണ് കരുതുന്നത്.

ഗേറ്റിന്റെ കൂര്‍ത്ത കമ്പി ചെവിയുടെ ഭാഗത്തു കൂടി തുളഞ്ഞു കയറുകയായിരുന്നു. വീട്ടുടമ അറിയിച്ചതിനെത്തുടര്‍ന്ന് പോലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.