കോയമ്പത്തൂർ കാർ ബോംബ് സ്ഫോടനം; ഇസ്ലാമിക് സ്റ്റേറ്റ് അനുഭാവി മുഹമ്മദ് ഇദ്രിസ് അറസ്റ്റിൽ

ഇസ്ലാമിക് സ്റ്റേറ്റ് ആസൂത്രണം ചെയ്ത കോയമ്പത്തൂർ കാർ ബോംബ് സ്ഫോടന കേസിൽ ഒരു പ്രതിയെ കൂടി എൻ ഐ എ അറസ്റ്റ് ചെയ്തു. കോയമ്പത്തൂർ സ്വദേശി മുഹമ്മദ് ഇദ്രിസിനെയായാണ് ഇപ്പോൾ എൻ ഐ എ അറസ്റ്റ് ചെയ്തത്. ഭീകരാക്രമണം നടത്താൻ ഇയാൾ മറ്റ് പ്രതികളുമായി ചേർന്ന് ഗൂഢാലോചന നടത്തി എന്നാണ് എൻ ഐ എയുടെ കണ്ടെത്തൽ.

2022 ഒക്ടോബർ 23ന് കോയമ്പത്തൂരിലെ പുരാതനമായ ഉക്കടം കോട്ടൈ സംഗമേശ്വർ തൃക്കോവിൽ ക്ഷേത്രത്തിന് മുന്നിൽ ഐ ഇ ഡി നിറച്ച വാഹനം പൊട്ടിത്തെറിക്കുകയായിരുന്നു. വാഹനം ഓടിച്ചിരുന്ന ഭീകരൻ ജമേഷ മുബീനും സ്ഫോടനത്തിൽ കൊല്ലപ്പെട്ടിരുന്നു. ജമേഷ മുബീനുമായി അടുത്ത ബന്ധം പുലർത്തിയിരുന്നയാളാണ് ഇപ്പോൾ പിടിയിലായിരിക്കുന്ന മുഹമ്മദ് ഇദ്രിസ്. സ്ഫോടനം നടത്തുന്നതിനായി ഗൂഢാലോചന നടത്തുകയും രഹസ്യ കൂടിക്കാഴ്ചകൾ സംഘടിപ്പിക്കുകയും ചെയ്തിരുന്നതിൽ ഇദ്രിസിനും സുപ്രധാന പങ്കുണ്ടായിരുന്നു.