പ്രശസ്ത കാര്‍ട്ടൂണിസ്റ്റ് അജിത് നൈനാൻ അന്തരിച്ചു

രാഷ്ട്രീയ കാര്‍ട്ടൂണുകളിലൂടെ ശ്രദ്ധേയനായ അജിത് നൈനാൻ (68) അന്തരിച്ചു. വെള്ളിയാഴ്ച രാവിലെ മൈസൂരുവിലെ ഫ്ലാറ്റില്‍ ഹൃദയാഘാതത്തെ തുടര്‍ന്നായിരുന്നു അന്ത്യം.

ഇന്ത്യ ടുഡേയിലെ ‘സെന്റര്‍ സ്റ്റേജ്’, ടൈംസ് ഓഫ് ഇന്ത്യയിലെ ‘നൈനാൻസ് വേള്‍ഡ്’ തുടങ്ങിയ കാര്‍ട്ടൂണ്‍ പരമ്പരകള്‍ ഏറെ പ്രശസ്തതമായിരുന്നു. ബാലമാസികയായ ടാര്‍ഗറ്റിലെ ‘ഡിറ്റക്ടീവ് മൂച്ച്‌വാല’ ജനപ്രിയ കാര്‍ട്ടൂണ്‍ കഥാപാത്രങ്ങളിലൊന്നാണ്. ഇന്ത്യൻ എക്‌സ്പ്രസിലും ഔട്ട്‌ലുക്കിലും നൈനാൻ ജോലി ചെയ്തിട്ടുണ്ട്.

ടൈംസ് ഓഫ് ഇന്ത്യയില്‍ ‘ജസ്റ്റ് ലൈക്ക് ദാറ്റ്’ എന്ന പേരില്‍ ദിനംപ്രതി കാര്‍ട്ടൂണ്‍ പ്രസിദ്ധീകരിച്ചിരുന്നു. 2009ലെ ലോക്‌സഭാ തെരഞ്ഞെടുപ്പ് സമയത്ത് ‘പൊളി ട്രിക്‌സ്’ എന്ന പേരില്‍ കാര്‍ട്ടൂണ്‍ സീരീസും ചെയ്തിരുന്നു.

1955 മേയ് 15ന് ഹൈദരാബാദില്‍ മലയാളികളായ എ.എം മാത്യുവിന്റെയും ആനി മാത്യുവിന്റെയും മകനായാണ് ജനനം. വിഖ്യാത കാര്‍ട്ടൂണിസ്റ്റ് അബു എബ്രഹാമിന്റെ സഹോദരീ പുത്രനാണ്. എലിസബത്ത് നൈനാനാണ് ഭാര്യ. സംയുക്ത, അപരാജിത എന്നിവര്‍ മക്കളാണ്.