അറസ്റ്റിലായ സര്‍ക്കാര്‍ സ്കൂള്‍ പ്രധാനാധ്യാപകൻ ലൈംഗിക പീഡനത്തിന് ഇരയാക്കിയത് 142 വിദ്യാര്‍ഥികളെ

ഹരിയാനയില്‍ അറസ്റ്റിലായ സര്‍ക്കാര്‍ സ്കൂള്‍ പ്രധാനാധ്യാപകൻ 142 വിദ്യാര്‍ഥികളെ ലൈംഗിക പീഡനത്തിന് ഇരയാക്കിയതായി റിപ്പോര്‍ട്ട്. നേരത്തെ 60ഓളം കുട്ടികളെ ലൈംഗികമായി പീഡിപ്പിച്ചുവെന്ന പരാതിയുടെ അടിസ്ഥാനത്തിലാണ് ഇയാളെ പൊലീസ് അറസ്റ്റ് ചെയ്തത്.

ലൈംഗികാതിക്രമ സമിതിയുടെ അന്വേഷണത്തിലാണ് ലൈംഗികാതിക്രമം പുറത്തുവന്നത്. വിദ്യാര്‍ഥികളെ ഓഫീസ് റൂമിലേക്ക് വിളിച്ചുവരുത്തിയ ശേഷം പ്രതി ഇവരെ ലൈംഗികമായി പീഡിപ്പിക്കുകയായിരുന്നുവെന്ന് സംസ്ഥാന വനിതാ കമീഷൻ അധ്യക്ഷ രേണു ഭാട്ടിയ പറഞ്ഞു.

നവംബര്‍ ആറിനായിരുന്നു ഹരിയാന പൊലീസ് ഇയാളെ അറസ്റ്റ് ചെയ്തത്. സെപ്തംബര്‍ 14നായിരുന്നു 60 പെണ്‍കുട്ടികളുടെ ലൈംഗികപീഡന പരാതി പൊലീസ് സംസ്ഥാന വനിത കമീഷന് കൈമാറുന്നത്. സംഭവത്തെ കുറിച്ച്‌ അന്വേഷിക്കാൻ പ്രത്യേക സമിതിയെ നിയോഗിച്ചിട്ടുണ്ട്. സംഭവത്തിന് പിന്നാലെ ഒക്ടോബര്‍ 27ന് പ്രതിയെ വിദ്യാഭ്യാസ വകുപ്പ് സസ്പെൻഡ് ചെയ്തിരുന്നു.