കേജ്‍രിവാളിന്റെ വീട്ടില്‍നിന്നും സ്വാതി ഇറങ്ങിവരുന്ന ദൃശ്യങ്ങള്‍ പുറത്ത്

ഡല്‍ഹി മുഖ്യമന്ത്രി അരവിന്ദ് കേജ്‌രിവാളിന്റെ വീട്ടില്‍ നിന്ന് സ്വാതി മലിവാള്‍ എംപി പുറത്തേയ്ക്കു വരുന്നതിന്റെ സിസിടിവി ദൃശ്യങ്ങള്‍ പുറത്ത്.

കേജ്‌രിവാളിന്റെ പിഎ ബൈഭവ് കുമാർ തന്നെ മർദിച്ചെന്ന് സ്വാതി ആരോപിക്കുന്ന മേയ് 13ലെ ദൃശ്യങ്ങളാണ് പുറത്തുവന്നത്. വനിതാ പൊലീസ് ഉദ്യോഗസ്ഥർക്കൊപ്പം സ്വാതി പുറത്തേക്ക് വരുന്നതാണ് ദൃശ്യങ്ങളില്‍. തന്റെ കയ്യില്‍ പിടിച്ചു പുറത്തേക്ക് കൊണ്ടുവരുന്ന വനിതാ പൊലീസിനെ സ്വാതി തട്ടിമാറ്റുന്നതും വിഡിയോയിലുണ്ട്.

മേയ് 13ന് മുഖ്യമന്ത്രിയുടെ വസതിയില്‍വച്ച്‌ ബൈഭവ് കുമാർ ക്രൂരമായി ആക്രമിച്ചെന്നും തലയ്ക്കും കാലിനും മുറിവേറ്റെന്നുമാണ് സ്വാതി ഡല്‍ഹി പൊലീസില്‍ പരാതി നല്‍കിയിട്ടുള്ളത്. എന്നാല്‍ പുറത്തുവന്ന ദൃശ്യങ്ങളില്‍ സ്വാതിക്ക് മുറിവേറ്റതായി സൂചനകളില്ല. ”സ്വാതി മലിവാളിന്റെ ആരോപണങ്ങളുടെ സത്യം” എന്ന പേരില്‍ ആം ആദ്മി പാർട്ടിയും ട്വിറ്ററില്‍ ദൃശ്യങ്ങള്‍ പങ്കുവച്ചിട്ടുണ്ട്.