പറങ്കികള്‍ വീണു, ജോര്‍ജിയക്ക് ചരിത്ര ജയം; ചെക്കിനെ തറപറ്റിച്ച്‌ തുര്‍ക്കിയയും പ്രീക്വാര്‍ട്ടറില്‍

ഡോർട്ട്മുണ്ട്: യൂറോ കപ്പ് ഗ്രൂപ്പ് ഘട്ടത്തിലെ അവസാന പോരാട്ടത്തില്‍ പോർച്ചുഗലിനെ അട്ടിമറിച്ച്‌ ജോർജിയ പ്രീ ക്വാർട്ടറില്‍ കടന്നു.

എതിരില്ലാത്ത രണ്ടുഗോളിനാണ് പറങ്കിപ്പടയെ വീഴ്ത്തിയത്. യൂറോയില്‍ കന്നി അങ്കത്തിനിറങ്ങിയ ജോർജിയ ഗ്രൂപ് എഫില്‍ നിന്ന് മികച്ച മൂന്നാം സ്ഥാനക്കാരായാണ് നോക്കൗട്ട് റൗണ്ടിലെത്തിയത്. വിച്ച ക്വാരറ്റ്സ്ഖേലിയയും ജോർജസ് മിക്കൗതാഡ്‌സെയുമാണ് ജോർജിയക്ക് വേണ്ടി ഗോള്‍ നേടിയത്.

മറ്റൊരു മത്സരത്തില്‍ ചെക്ക് റിപബ്ലിക്കിനെ 2-1 ന് കീഴടക്കി തുർക്കിയ രണ്ടാം സ്ഥാനക്കാരായി പ്രീ ക്വാർട്ടറിലെത്തി. ചെക്ക് റിപബ്ലിക് നോക്കൗട്ട് കാണാതെ പുറത്തായി.

ആദ്യ രണ്ടുമത്സരങ്ങള്‍ ജയിച്ച്‌ നേരത്തെ പ്രീക്വാർട്ടർ ഉറപ്പിച്ച പോർച്ചുഗല്‍ ബ്രൂണോ ഫെർണാണ്ടസ്, ബെർണാഡോ സില്‍വ തുടങ്ങിയ പരിചയ സമ്ബന്നരായ താരങ്ങളെ ബെഞ്ചിലിരുത്തിയാണ് തുടങ്ങിയത്. ക്രിസ്റ്റ്യാനോ റൊണാള്‍ഡോ നയിച്ച മുന്നേറ്റ നിരയില്‍ യുവ താരങ്ങളായ ഫ്രാൻസിസ്കോ കോണ്‍സൈസോ, ജാവോ ഫെലിക്സുമാണ് ആദ്യ ഇലവനില്‍ ഇടംപിടിച്ചത്.

കളി തുടങ്ങി രണ്ടാം മിനിറ്റില്‍ തന്നെ പോർച്ചുഗലിനെ ഞെട്ടിച്ച്‌ ജോർജിയ ലീഡെടുത്തു. ജോർജസ് മിക്കൗതാഡ്‌സെയുടെ പാസില്‍ സ്ട്രൈക്കർ വിച്ച ക്വാരറ്റ്സ്ഖേലിയയാണ് ജോർജിയയെ മുന്നിലെത്തിച്ചത്. പന്തിന്മേലുള്ള നിയന്ത്രണം ഏറിയ പങ്കും പോർച്ചുഗലിെൻറ കയ്യിലായിരുന്നെങ്കിലും തുടരെ തുടരെയുള്ള ജോർജിയയുടെ കൗണ്ടർ അറ്റാക്കുകളുമായി കടുത്ത വെല്ലുവിളിയാണ് ഉ‍യർത്തിയത്.

57ാം മിനിറ്റില്‍ ജോർജിയ ലീഡ് ഇരട്ടിയാക്കി. ജോർജിയക്ക് അനുകൂലമായി ലഭിച്ച പെനാല്‍റ്റി ജോർജസ് മിക്കൗതാഡ്‌സെ പിഴവുകളില്ലാതെ വലയിലെത്തിച്ചു.

ജോർജിയൻ ഗോള്‍മുഖത്ത് ഡസൻ കണക്കിന് മുന്നേറ്റങ്ങള്‍ നടത്തിയെങ്കിലും ഒരണ്ണം പോലും ലക്ഷ്യത്തിലെത്തിക്കാൻ പോർചുഗലിനായില്ല .

ചെക്കിന് മടക്ക ടിക്കറ്റ് നല്‍കി തുർക്കിയ

മുന്നേറ്റ താരം അന്റോനിൻ ബാറാക് ചുവപ്പ് കാർഡ് കണ്ട് പുറത്തായതോടെ പത്തുപേരായി ചുരുങ്ങിയ ചെക്ക് റിപബ്ലിക് ദുർബലമാവുന്ന കാഴ്ചയാണ് കണ്ടത്. ആദ്യ പകുതി ഗോള്‍ രഹിതമായി പിടിച്ചു നിന്നെങ്കിലും രണ്ടാം പകുതിയില്‍ 51 ാം മിനിറ്റില്‍ തുർക്കി ലീഡെടുത്തു. ഇസ്മായില്‍ യുക്സേക് നല്‍കിയ പാസില്‍ ഹകാൻ കാല്‍ഹാനോഗ്ലുവിന്റെ വെടിച്ചില്ല് ഷോട്ട് ചെക്കിന്റെ വലതുളച്ച്‌ കയറി.

എന്നാല്‍, 66ാം മിനിറ്റില്‍ തോമസ് സുസേക്കിലൂടെ ചെക്ക് മറുപടി ഗോള്‍ നേടി. എന്നാല്‍, ഫൈനല്‍ വിസില്‍ മുഴങ്ങാൻ കാത്തിരിക്കെ 94ാം മിനിറ്റില്‍ മുൻപ് തുർക്കി വിജയ ഗോള്‍ കണ്ടെത്തി. പകരക്കാരനായി ഇറങ്ങിയ സ്ട്രൈക്കർ സെൻക് ടോസനാണ് ഗോള്‍ നേടിയത്.