ഐപിഎൽ 2025 ഉദ്ഘാടനവും ഫൈനലും ഈഡൻ ഗാർഡനിൽ, ആദ്യ മത്സരം മാർച്ച് 21ന്

2025 ഇന്ത്യൻ പ്രീമിയർ ലീ​ഗ് മാർച്ച് 21ന് ആരംഭിക്കുമെന്ന് റിപ്പോർട്ട്. ഉദ്ഘാടന മത്സരവും ഫൈനൽ മത്സരവും നടക്കുന്നത് കൊൽക്കത്തയിലെ ഈഡൻ ​ഗാർഡൻസ് സ്റ്റേഡിയത്തിലാണ്. നിലവിലെ ഐപിഎൽ ചാംപ്യന്മാർ കൊൽക്കത്ത നൈറ്റ് റൈഡേഴ്സ് എന്നതിനാലാണ് ഉദ്ഘാടന, ഫൈനൽ മത്സരങ്ങൾക്ക് ഈഡൻ ​ഗാർഡൻസ് വേദിയാകുന്നത്. നിലവിലെ റണ്ണേഴ്സ് അപ്പുകളായ സൺറൈസേഴ്സ് ഹൈദരാബാദിന്റെ ഹോം സ്റ്റേഡിയമായ ഉപ്പലിലാണ് രണ്ട് പ്ലേ ഓഫ് മത്സരങ്ങൾ നടക്കുക.

അതിനിടെ ചാംപ്യൻസ് ട്രോഫിയുടെ സമാപനത്തോടെ മാത്രമെ ഐപിഎൽ 2025ന്റെ ഔദ്യോ​ഗിക തിയതി പുറത്തുവരികയുള്ളൂ. മാർച്ച് ഒമ്പതിനാണ് ചാംപ്യൻസ് ട്രോഫിക്ക് അവസാനമാകുക. അന്താരാഷ്ട്ര ക്രിക്കറ്റ് ടൂർണമെന്റിന് ശേഷം താരങ്ങൾക്ക് ആവശ്യത്തിന് വിശ്രമം ഉറപ്പുവരുത്തുകയാണ് ലക്ഷ്യം.

ഫെബ്രുവരി ഏഴ് മുതൽ 25 വരെയാണ് വനിത പ്രീമിയർ ലീ​ഗ് നടക്കുക. നാല് വേദികളിലായി ടൂർണമെന്റ് പുരോ​ഗമിക്കും. മുംബൈ, ലഖ്നൗ, ബെംഗളൂരു തുടങ്ങിയ ഇടങ്ങളിലാണ് മത്സരങ്ങൾ നടക്കുക.