കൊല്ലത്ത് കുടുംബാരോഗ്യ കേന്ദ്രം വഴി വിതരണം ചെയ്ത രക്തസമ്മര്‍ദ ഗുളിക റബര്‍ പോലെ വളയുന്നു

കുടുംബാരോഗ്യ കേന്ദ്രം വഴി വിതരണം ചെയ്ത രക്തസമ്മര്‍ദത്തിനുള്ള ഗുളിക റബര്‍ പോലെ വളയുന്നുവെന്ന് പരാതി. ക്ലാപ്പന ഗ്രാമപഞ്ചായത്ത് കുടുംബാരോഗ്യ കേന്ദ്രം വഴി വിതരണം ചെയ്ത ഗുളികകള്‍ ഒടിക്കാന്‍ കഴിയാതെ റബര്‍ പോലെ വളയുന്നുവെന്നാണ് ആരോപണം. രോഗികള്‍ക്ക് ശാരീരിക ബുദ്ധിമുട്ട് ഉണ്ടായതോടെ ഗുളികയുടെ വിതരണം നിര്‍ത്തിവെച്ചു. കേരളാ മെഡിക്കല്‍ സര്‍വീസ് കോര്‍പ്പറേഷന്‍ ലിമിറ്റഡ് വിതരണം ചെയ്ത ഗുളിക സംബന്ധിച്ചാണ് പരാതിയുയര്‍ന്നിരിക്കുന്നത്.

ഗുളിക കൂടുതല്‍ പരിശോധനകള്‍ക്കായി ഡ്രഗ്‌സ് ലാബിലേക്ക് അയച്ചു. ഗുളിക കഴിച്ച നിരവധിപേര്‍ക്ക് അമിത ഉറക്കവും ശരീര വേദനയും അനുഭവപ്പെട്ടു. പരാതി ശരിയാണെന്ന് ബോധ്യപ്പെട്ടതിനെ തുടര്‍ന്നാണ് വിതരണം നിര്‍ത്തിയതെന്ന് ക്ലാപ്പന പഞ്ചായത്ത് പ്രസിഡന്റ് പറഞ്ഞു.