പാകിസ്ഥാന്‍ അവസാന സ്ഥാനത്ത്, മോശം പ്രകടനത്തില്‍ പരിശീലകനെ പുറത്താക്കി പിസിബി

വനിതാ ഏകദിന ലോകകപ്പിലെ പാകിസ്ഥാൻ ടീമിന്റെ മോശം പ്രകടനത്തില്‍ മുഖ്യ പരിശീലകന്‍ മുഹമ്മദ് വസീമിനെ പുറത്താക്കി പാകിസ്ഥാന്‍ ക്രിക്കറ്റ് ബോര്‍ഡ്. ഏപ്രിലില്‍ ലാഹോറില്‍ നടന്ന യോഗ്യതാ മത്സരങ്ങളില്‍ ഒന്നാമതെത്തി പാകിസ്ഥാന്‍ ലോകകപ്പ് യോഗ്യത നേടിയെങ്കിലും ഇന്ത്യയിലും ശ്രീലങ്കയിലുമായി നടന്ന ടൂര്‍ണമന്റില്‍ പാകിസ്ഥാന്‍ അവസാന സ്ഥാനക്കാരായാണ് ഫിനിഷ് ചെയ്തത് .

ലോകകപ്പില്‍ ഫാത്തിമ സന നയിച്ച ടീം നാല് മത്സരങ്ങള്‍ തോറ്റപ്പോള്‍, മൂന്ന് മത്സരങ്ങള്‍ മഴ കാരണം ഉപേക്ഷിച്ചു. കൊളംബോയിലാണ് പാകിസ്ഥാന്‍ എല്ലാ മത്സരങ്ങളും കളിച്ചത്. ലോകകപ്പോടെ വസീമിന്റെ കരാര്‍ അവസാനിച്ചുവെന്നും ഇനി കരാര്‍ നീട്ടേണ്ടതില്ലെന്നുമാണ് പിസിബിയുടെ തീരുമാനം. പകരം പുതിയ പരിശീലകനെ നിയമിക്കാനും ബോര്‍ഡ് തീരുമാനിച്ചിട്ടുണ്ട്.