പഞ്ചാബി ഗായകന്‍ ഹര്‍മന്‍ സിദ്ധു വാഹനാപകടത്തില്‍ മരിച്ചു

പ്രശസ്ത പഞ്ചാബി ഗായകന്‍ ഹര്‍മന്‍ സിദ്ധു വാഹനാപകടത്തില്‍ മരിച്ചു. അദ്ദേഹത്തിന് 37 വയസ്സായിരുന്നു. സ്വന്തം വീട്ടിലേക്ക് വരുന്നതിനിടെ, സിദ്ധു സഞ്ചരിച്ചിരുന്ന കാർ ഒരു ട്രക്കുമായി കൂട്ടിയിടിക്കുകയായിരുന്നു. അപകടത്തിൽ ഹർമന്റെ കാർ പൂർണമായും തകർന്നിട്ടുണ്ട്.

ഹർമൻ സിദ്ധു സംഭവസ്ഥലത്തു വെച്ചു തന്നെ മരിച്ചു എന്നാണ് റിപ്പോർട്ട്. പഞ്ചാബി സംഗീത മേഖലയിൽ സജീവമായിരുന്ന ഹർമൻ സിദ്ധു, ഗായിക പൂജയോടൊപ്പം ചേർന്ന് ആലപിച്ച ‘പേപ്പർ യാ പ്യാർ’ എന്ന ഗാനം ഏറെ ശ്രദ്ധേയമായിരുന്നു. അദ്ദേഹത്തിന്റെ ശബ്ദവും ലാളിത്യവും വളരെ പെട്ടെന്ന് തന്നെ നിരവധി ആരാധകരെ നേടിക്കൊടുത്തു. ‘കോയി ചക്കർ നയി’, ‘ബേബേ ബാപ്പു’, ‘ബബ്ബർ ഷേർ’, ‘മുൾട്ടാൻ വേഴ്സസ് റഷ്യ’ എന്നിവ അദ്ദേഹത്തിന്‍റെ ശ്രദ്ധേയമായ ഗാനങ്ങളാണ്.

ഇൻസ്റ്റഗ്രാമിലും ഫേസ്ബുക്കിലും ഹർമൻ സിദ്ധുവിന് നിരവധി ഫോളോവേഴ്സ് ഉണ്ട്. ഹർമൻ സിദ്ധു മ്യൂസിക് എന്ന പേരിൽ 13.1K സബ്‌സ്‌ക്രൈബർമാരുള്ള ഒരു യൂട്യൂബ് ചാനലും ഗായകനുണ്ട്.