സഹോദരനെ കൊലപ്പെടുത്തിയ കേസിൽ പരോളിലിറങ്ങി മുങ്ങിയ പ്രദീപ് സക്‌സേന അബ്ദുൾ റഹീമായി; 36 വർഷത്തിന് ശേഷം പിടിയിലായി

36 വർഷങ്ങൾക്ക് മുമ്പ് ഉത്തർപ്രദേശിലെ ബറേയ്‌ലിയിൽ നിന്നും മുങ്ങിയ കൊലക്കേസ് പ്രതിയെ പൊലീസ് പിടികൂടി. പ്രദീപ് സ്‌ക്‌സേന എന്ന ആളാണ് പൊലീസിനെ വെട്ടിച്ച് ഇത്രയും കൊല്ലം മുങ്ങി നടന്നത്. സഹോദരനെ കൊലപ്പെടുത്തിയ കേസിൽ ജീവപര്യന്തം ശിക്ഷ അനുഭവിച്ചു വന്ന ഇയാൾ പരോളിൽ ഇറങ്ങി മുങ്ങുകയാണ് ഉണ്ടായത്. പിന്നാലെ ഇയാൾ മതപരിവർത്തനം നടത്തുകയും പേരും രൂപവും മാറ്റുകയുമായിരുന്നു.

1987ലാണ് കേസിനാസ്പദമായ സംഭവമുണ്ടായത്. 1989ൽ ഇയാൾ ശിക്ഷിക്കപ്പെട്ടു. പിന്നീട് മൊറാദാബാദിലേക്ക് കടന്ന പ്രതി അവിടെ നിന്നും നൂറു കിലോമീറ്റർ അകലെയുള്ള സ്ഥലത്ത് എത്തി, അവിടെ ഒരു പുതിയ ജീവിതം ആരംഭിച്ചു. പ്രദീപ് സക്‌സേന ഇതോടെ അബ്ദുൾ റഹീമായി മാറി. താടിയൊക്കെ വളർത്തി രൂപം മാറ്റി ഡ്രൈവറായി ജോലി ചെയ്ത് വരികയായിരുന്നു.

ഇക്കഴിഞ്ഞ ഒക്ടോബർ 16 ന് സക്‌സേനയെ നാലാഴ്ചക്കുള്ളിൽ കോടതിയിൽ ഹാജരാക്കണമെന്ന് അലഹബാദ് ഹൈക്കോടതി ഉത്തരവിട്ടു. ഇതോടെ ഉദ്യോഗസ്ഥർ പഴയ ഫയൽ പൊടിതട്ടിയെടുത്തു, ഒരു സംഘത്തെ ഇയാളെ കണ്ടെത്താനായി നിയോഗിച്ചു. പിന്നാലെ സക്‌സേനയുടെ മറ്റൊരു സഹോദരനെ പൊലീസ് ബന്ധപ്പെട്ടു. തുടർന്നാണ് ഇയാൾ മതവും ഐഡന്റിന്റിയുമെല്ലാം മാറ്റിയെന്ന് അറിയുന്നത്. കൂടുതൽ അന്വേഷണത്തിൽ പ്രതി പലപ്പോഴും ബറേലിയിൽ എത്തിയിട്ടുണ്ടെന്നും വ്യക്തമായി. ഒടുവിൽ പ്രതിയെ വിദഗ്ധമായി പൊലീസ് വലയിലാക്കി.

ചോദ്യം ചെയ്യലിൽ താൻ പ്രദീപ് സക്‌സേനയാണെന്ന് പ്രതി സമ്മതിക്കുകയും ചെയ്തു. 2002 ൽ ആണ് ഇയാൾ രൂപവും ഭാവവുമെല്ലാം മാറിയത്. കഴിഞ്ഞദിവസം ഇയാളെ പൊലീസ് കോടതിയിൽ ഹാജരാക്കി.