ഉമ തോമസ് കാണിക്കുന്ന പക്വത പോലും കെവി തോമസിനില്ല; സ്ഥാനം പ്രതീക്ഷിച്ചു നാണം കെട്ട് നടക്കുകയാണ് കെവി തോമസെന്ന് രാജ് മോഹൻ ഉണ്ണിത്താൻ

ഇടതുമുന്നണിയ്ക്കായി പ്രചാരണത്തിന് ഇറങ്ങുന്ന കെ വി തോമസിനെതിരെ രൂക്ഷവിമർശനവുമായി മുതിർന്ന കോൺഗ്രസ് നേതാവും എംപിയുമായ രാജ്മോഹൻ ഉണ്ണിത്താൻ. കെ.വി തോമസ് പ്രതികരണമര്‍ഹിക്കുന്നില്ലെന്നാണ് രാജ് മോഹന്‍ ഉണ്ണിത്താന്‍റെ പരാമര്‍ശം.

പ്രതിപക്ഷ നേതാവ് വിഡി സതീശനൊപ്പം മാധ്യമങ്ങളോട് സംസാരിക്കുകയായിരുന്നു രാജ് മോഹൻ ഉണ്ണിത്താൻ. ഒരു പാർട്ടിയിൽനിന്ന് ലഭിക്കാവുന്നതെല്ലാം തോമസിന് ലഭിച്ചു. ഇനി പാർട്ടിയിൽനിന്ന് ഒന്നും ലഭിക്കില്ല എന്നദ്ദേഹത്തിന് മനസിലായി. സ്ഥാനമാനങ്ങൾ മുൻനിർത്തി മാത്രമാണ് ഇത്തരത്തിലൊരു ചുവട് മാറ്റമെന്ന് ഉണ്ണിത്താൻ ആരോപിച്ചു.

സ്ഥാനം പ്രതീക്ഷിച്ചു നാണം കെട്ട് നടക്കുകയാണ് തോമസ്. ഉമ തോമസ് കാണിക്കുന്ന പക്വത പോലും കെവി തോമസ് കാണിക്കുന്നില്ല. അദ്ദേഹത്തെ പനപോലെ വളര്‍ത്തിയത് കോണ്‍ഗ്രസാണ്. കെ.വി തോമസ് ഇനിയുള്ള കാലം മാർക്സിസ്റ്റ്‌ പാർട്ടിക്കുവേണ്ടി വിടുപണി ചെയ്താൽ എറണാകുളത്തുകാർ മറുപടി നൽകുമെന്നും രാജ്മോഹന്‍ ഉണ്ണിത്താന്‍ പറഞ്ഞു.
കോൺഗ്രസ്സിന് കെവി തോമസ് ഒരു വിഷയമേയല്ലെന്നും ഉമാ തോമസിന്റെ വിജയം മാത്രമാണ് മുന്നിലെന്നും രാജ് മോഹൻ ഉണ്ണിത്താൻ വ്യക്തമാക്കി.

Content Highlight- Congress MP Rajmohan Unnithan criticizes KV Thomas for campaigning for the Left