ഒരു കിലോ സവാളയ്ക്ക് 35 രൂപ; വില നിയന്ത്രിക്കാന് ഇടപെടലുമായി സര്ക്കാര്
National Desk
Posted On September 4, 2026
സവാള വിലവര്ധനയില് ജനങ്ങള്ക്ക് ആശ്വാസമൊരുക്കാന് ശക്തമായ വിപണി ഇടപെടലുമായി സംസ്ഥാന സര്ക്കാര്. വിപണിയെ അതിന്റെ വഴിക്ക് വിടില്ലെന്നും ക്രമാതീതമായ വിലവര്ധന നിയന്ത്രിക്കാന് ആവശ്യമായ എല്ലാ ഇടപെടലുകളും സര്ക്കാര് നടത്തുമെന്നും കൃഷിവകുപ്പ് മന്ത്രി അഡ്വ. ടി. സിദ്ദിഖ് വ്യക്തമാക്കി. ഇതിന്റെ ഭാഗമായി നാഷണല് കോ-ഓപ്പറേറ്റീവ് കണ്സ്യൂമേഴ്സ് ഫെഡറേഷന് ഓഫ് ഇന്ത്യ ലിമിറ്റഡ് വഴി 100 ടണ് സവാള വിപണിയിലെത്തിക്കും. ആദ്യഘട്ടമായി 30 ടണ് സവാളയ്ക്കുള്ള ഓര്ഡര് നല്കി. സംഭരിക്കുന്ന സവാള ഹോര്ട്ടികോര്പ്പിന്റെയും സപ്ലൈകോയുടെയും ഔട്ട്ലെറ്റുകള് വഴി കിലോയ്ക്ക് 35 നിരക്കില് പൊതുജനങ്ങള്ക്ക് ലഭ്യമാക്കുമെന്ന് മന്ത്രി ടി സിദ്ദിഖ് പറഞ്ഞു.
സംസ്ഥാനത്തെ വിവിധ വിപണികളില് സവാള വില ഗണ്യമായി ഉയര്ന്ന സാഹചര്യത്തില് കൃഷിവകുപ്പ് മന്ത്രി അഡ്വ. ടി. സിദ്ദിഖിന്റെയും ഭക്ഷ്യ-പൊതുവിതരണ വകുപ്പ് മന്ത്രി അനൂപ് ജേക്കബിന്റെയും നേതൃത്വത്തില് സെക്രട്ടേറിയറ്റില് ചേര്ന്ന ഉദ്യോഗസ്ഥതല യോഗത്തിലാണ് അടിയന്തര വിപണി ഇടപെടലിന് തീരുമാനമായത്. കൊല്ലങ്കോട്, കായംകുളം, ചാല, നോര്ത്ത് പറവൂര് തുടങ്ങിയ വിപണികളില് സവാളയുടെ മൊത്തവ്യാപാര വില കിലോയ്ക്ക് 58 മുതല് 80 വരെ ഉയര്ന്ന സാഹചര്യത്തില് ഇത്തരം വിപണികള്ക്ക് ആദ്യഘട്ടത്തില് മുന്ഗണന നല്കും. തുടര്ന്ന് മറ്റ് പ്രദേശങ്ങളിലേക്കും ഇടപെടല് വ്യാപിപ്പിക്കും.
