ഇൻസ്റ്റഗ്രാമിലൂടെ പരിചയപ്പെട്ട പെൺകുട്ടിയെ തട്ടിക്കൊണ്ട് പോവാൻ ശ്രമം; മൂന്ന് പേർ കസ്റ്റഡിയിൽ

ഇൻസ്റ്റാഗ്രാമിലൂടെ പരിചയപ്പെട്ട പെൺകുട്ടിയെ തട്ടിക്കൊണ്ടുപോയി പീഡിപ്പിച്ച കേസിൽ മൂന്ന് പേർ പൊലീസ് കസ്റ്റഡിയിൽ. മൂവാറ്റുപുഴ സ്വദേശിയായ വിഷ്ണു, ഇയാളുടെ അമ്മ ടിന്റു, സുഹൃത്ത് കൊല്ലം സ്വദേശി സുരേഷ് എന്നിവരെയാണ് പിടികൂടിയത്. കർണാടകയിലെ സുള്ള്യയിൽ വെച്ചാണ് ഇവരെ വെള്ളൂർ പൊലീസ് പിടികൂടിയത്.

കഴിഞ്ഞ മാസം പത്തിനാണ് സംഭവം. ഇറുമ്പയം സ്വദേശിയായ പെൺകുട്ടി ഇൻസ്റ്റഗ്രാമിലൂടെ പരിചയപ്പെട്ട വിഷ്ണുവിനൊപ്പം പോവുകയായിരുന്നു. പെൺകുട്ടിയുടെ പരാതിയുടെ അടിസ്ഥാനത്തിലാണ് പൊലീസ് കേസെടുത്തത്. തുടർന്ന് മൊബൈൽ ഫോൺ കേന്ദ്രീകരിച്ച് പരിശോധന നടത്തി. ഇത് മനസ്സിലാക്കിയതോടെ പെൺകുട്ടിയെ മൂവാറ്റുപുഴ കെ എസ് ആർ ടി സി സ്റ്റാന്‍ഡിൽ ഉപേക്ഷിച്ച് നാട് വിട്ടു. പിന്നീട് നടത്തിയ പരിശോധനയിലാണ് ഇവർ കർണാടകയിൽ ഉണ്ടെന്ന് മനസ്സിലായത്.

മൂന്ന് പേരെയും വൈക്കം കോടതിയിൽ ഹാജരാക്കി റിമാൻഡ് ചെയ്തു. വെള്ളൂർ എസ് ഐ ജെ വിജിമോന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.

Content Highlights: Rape case arrest