വിജയ് ബാബു ഇന്നെത്തില്ല; കൊച്ചിയിലേക്കുള്ള വിമാന ടിക്കറ്റ് റദ്ദാക്കി

പുതുമഖനടിയെ പീഡിപ്പിച്ച കേസില്‍ പ്രതിയായ നിര്‍മാതാവ് വിജയ് ബാബു ഇന്ന് എത്തില്ല. ഇന്ന് കൊച്ചിയില്‍ എത്തുമെന്നായിരുന്നു ഹൈക്കോടതിയെ വിജയ് ബാബു അറിയിച്ചിരുന്നത്. എന്നാല്‍ കൊച്ചിയിലേക്കുള്ള വിമാന ടിക്കറ്റ് വിജയ് ബാബു റദ്ദാക്കി. രാവിലെ 9 മണിക്ക് ദുബായില്‍ നിന്നെത്തുന്ന എമിറേറ്റ് വിമാനത്തിലായിരുന്നു ടിക്കറ്റ് ബുക്ക് ചെയ്തിരുന്നത്.

മുന്‍കൂര്‍ ജാമ്യഹര്‍ജി ഇന്ന് വീണ്ടും ഹൈക്കോടതി പരിഗണിക്കാനിരിക്കെയാണ് വിജയ് ബാബു മടക്കയാത്ര റദ്ദാക്കിയത്. ഇന്ന് ഹാജരായില്ലെങ്കില്‍ ജാമ്യാപേക്ഷ കോടതി തള്ളിയേക്കും. യാത്രാരേഖകള്‍ ഹാജരാക്കിയാല്‍ ജാമ്യഹര്‍ജി പരിഗണിക്കാമെന്ന് കോടതി നിലപാടെടുത്തതിനെ തുടര്‍ന്നാണ് 30ന് മടങ്ങിയെത്താനുള്ള വിമാന ടിക്കറ്റ് വിജയ് ബാബുവിന്റെ അഭിഭാഷകന്‍ ഹാജരാക്കിയത്.

കേസില്‍ വിജയ് ബാബു നാട്ടിലെത്തിയതിന് ശേഷം തുടര്‍നടപടികള്‍ സ്വീകരിച്ചാല്‍ പോരേയെന്നായിരുന്നു ഹൈക്കോടതി പോലീസിനോട് ചോദിച്ചത്. എന്നാല്‍ നിയമവ്യവസ്ഥയില്‍ നിന്ന് രക്ഷപ്പെട്ട പ്രതിയോട് യാതൊരു കരുണയും കാട്ടരുതെന്നായിരുന്നു പ്രോസിക്യൂഷന്‍ ആവശ്യപ്പെട്ടത്. ജാമ്യം നല്‍കരുതെന്ന് അതിജീവിതയും ആവശ്യപ്പെട്ടിരുന്നു.

Content Highlights: Vijay Babu, Bail, Flight Ticket, High Court