സ്വര്‍ണവിലയില്‍ ആശ്വാസം; റെക്കോഡില്‍ നിന്ന് താഴ്ന്നിറങ്ങി

റെക്കോഡുകള്‍ കടപുഴക്കിയുള്ള കുതിപ്പിന് ബ്രേക്കിട്ട് ഒടുവില്‍ സ്വര്‍ണവില താഴേക്ക്. കേരളത്തില്‍ ഇന്ന് പവന്‍വില 320 രൂപ കുറഞ്ഞ് 48,280 രൂപയായി.

40 രൂപ താഴ്ന്ന് 6,035 രൂപയാണ് ഗ്രാം വില. പവന്‍ 48,600 രൂപയും ഗ്രാം 6,075 രൂപയും എന്ന സര്‍വകാല റെക്കോഡ് വിലയില്‍ നിന്നാണ് ഇന്ന് താഴേക്കിറങ്ങിയത്. ഈ മാസം മാത്രം പവന്‍ 2,520 രൂപയുടെയും ഗ്രാം 315 രൂപയുടെയും വര്‍ധന രേഖപ്പെടുത്തിയിരുന്നു.

18 കാരറ്റ് സ്വര്‍ണവില ഗ്രാമിന് 5,040 രൂപയെന്ന റെക്കോഡില്‍ നിന്ന് ഇന്ന് 30 രൂപ കുറഞ്ഞ് 5,010 രൂപയിലെത്തി. ഒരു രൂപ കുറഞ്ഞ് ഗ്രാമിന് 78 രൂപയിലാണ് ഇന്ന് വെള്ളി വ്യാപാരവും നടക്കുന്നത്.