ഗുജറാത്തില്‍ ബാങ്കിന്റെ ഭിത്തി തുരന്ന് മോഷണം; ‘ദി ബാങ്ക് ജോബ്’ സിനിമ പ്രചോദനം

ഗുജറാത്തിലെ സൂറത്തില്‍ നടന്നത് വന്‍ ബാങ്ക് കൊള്ള. ഇംഗ്ലീഷ് സിനിമയായ ‘ദി ബാങ്ക് ജോബി’ല്‍ നിന്നും പ്രചോദനമുള്‍ക്കൊണ്ടാണ് മോഷണം നടത്തിയത്. ദേശീയ മാധ്യമമായ ടൈംസ് ഓഫ് ഇന്ത്യയാണ് വാർത്ത റിപ്പോർട്ട് ചെയ്തത്.

കിം ക്രോസ് റോഡിന് സമീപമുളള യൂണിയന്‍ ബാങ്ക് ഓഫ് ഇന്ത്യയുടെ ശാഖയില്‍ ചൊവ്വാഴ്ച പുലര്‍ച്ചെയാണ് മോഷണം നടന്നത്. ബാങ്കിലെ നിരീക്ഷണ ക്യാമറകളുടെ കേബിളുകള്‍ മുറിച്ച് അകത്ത് പ്രവേശിച്ച മോഷ്ടാക്കള്‍ അലാറം കേടുവരുത്തുകയും ചെയ്തിരുന്നു. തുടര്‍ന്നാണ് ബാങ്കിലെ ലോക്കറുകള്‍ തകര്‍ത്തത്.

ബാങ്ക് നിലവറയിലെ ഭിത്തി തുരന്ന് ഉള്ളിലെത്തിയ കള്ളന്മാർ 75 ലോക്കറുകളില്‍ ആറെണ്ണം തകര്‍ത്ത് 40 ലക്ഷം രൂപ വിലമതിക്കുന്ന ആഭരണങ്ങള്‍ കടത്തി. ഭിത്തിയില്‍ രണ്ടടി വലിപ്പമുള്ള കുഴിയുണ്ടാക്കിയാണ് ഇവര്‍ ലോക്കര്‍ റൂമിലേക്ക് കടന്നത്.

തകര്‍ത്ത ലോക്കറുകളില്‍ മൂന്നെണ്ണം ശൂന്യമായിരുന്നു. ബാക്കി 3 ലോക്കറുകളില്‍ നിന്നാണ് ഇവര്‍ സ്വര്‍ണം കടത്തിയത്. ലോക്കര്‍ ഉടമകളെല്ലാം പലയിടങ്ങളിലായതുകൊണ്ട് ഇവര്‍ വന്ന് പരിശോധിച്ച ശേഷമേ പൊലീസിന് ലോക്കറുകളിലെ നഷ്ടം എത്രയെന്ന് കൃത്യമായ കണക്ക് നല്‍കാനാകൂ.മോഷ്ടാക്കള്‍ പ്രൊഫഷണലുകളാണെന്നും ബാങ്കുമായി ബന്ധമുള്ള ആര്‍ക്കെങ്കിലും മോഷണത്തില്‍ പങ്കുണ്ടോ എന്നും പൊലീസ് പരിശോധിക്കുന്നുണ്ട്.