മഹാരാഷ്ട്രയില്‍ ഫഡ്‌നാവിസ് മുഖ്യമന്ത്രി? ഡല്‍ഹിയില്‍ അമിത് ഷായുടെ നിര്‍ണായക ചര്‍ച്ച
National Desk
Posted On November 28, 2024
മഹാരാഷ്ട്രയില്‍ സര്‍ക്കാര്‍ രൂപീകരണവുമായി ബന്ധപ്പെട്ട് ആഭ്യന്തര മന്ത്രി അമിത് ഷായുടെ നിര്‍ണായക യോഗം ഇന്നു ഡല്‍ഹിയില്‍. മഹായുതി നേതാക്കളുമായാണ് അമിത് ഷാ കൂടിക്കാഴ്ച നടത്തുക. നിയമസഭാ തെരഞ്ഞെടുപ്പില്‍ സഖ്യം വന്‍ വിജയം നേടിയെങ്കിലും സര്‍ക്കാര്‍ രൂപീകരണം വൈകുന്ന പശ്ചാത്തലത്തിലാണ് യോഗം. മുഖ്യമന്ത്രി സ്ഥാനത്തിനും രണ്ട് ഉപമുഖ്യമന്ത്രിമാര്‍ വേണമോ എന്ന കാര്യത്തിലും യോഗത്തില്‍ തീരുമാനമാവും.
മുഖ്യമന്ത്രി ആരാവണമെന്നുള്ളതില്‍ ബിജെപിയുടെ തീരുമാനം അനുസരിക്കുമെന്ന് പ്രധാനമന്ത്രി നരേന്ദ്ര മോദിക്ക് ഉറപ്പ് നല്‍കിയതായി ഏകനാഥ് ഷിന്‍ഡെ വ്യക്തമാക്കിയിരുന്നു. ഇന്നത്തെ യോഗത്തില്‍ കാര്യങ്ങളില്‍ വ്യക്തത വരുമെന്ന് എന്‍സിപി നേതാവ് അജിത് പവാറും പ്രതികരിച്ചു. ഷിന്‍ഡെ വഴങ്ങിയതോടെ ബിജെപി നേതൃത്വത്തില്‍ ഫഡ്നാവിസിന്റെ നേതൃത്വത്തില്‍ പുതിയ സര്‍ക്കാര്‍ അധികാമേല്‍ക്കുന്നതിന് വഴിയൊരുങ്ങി.
ഡല്‍ഹിയില്‍ അമിത് ഷായുമായി നടക്കുന്ന ചര്‍ച്ചയില്‍ സര്‍ക്കാര്‍ രൂപീകരണവുമായി ബന്ധപ്പെട്ട എല്ലാ തീരുമാനങ്ങളും എടുക്കും. ഇത് അന്തിമമായിരിക്കുമെന്നും ഷിന്‍ഡെ പറഞ്ഞു. അടുത്ത മുഖ്യമന്ത്രി ആരെന്നുള്ള കാര്യത്തില്‍ ബിജെപി നേതൃത്വത്തിന്റെ തീരുമാനത്തെ താന്‍ പൂര്‍ണമായി പിന്തുണയ്ക്കുമെന്നും തടസവാദം ഉന്നയിക്കില്ലെന്നും ഷിന്‍ഡെ പറഞ്ഞു.
